Мена Массуд: “Аладдинаас хойш нэг ч санал аваагүй”

2019-12-07 15:00:26

Дэлхийн олон үзэгчдийг байлдан дагуулж 1 тэрбум долларын орлого олсон Аладдин киноны эрэгтэй гол дүрд тоглосон Мена Массудын талаарх мэдээг хүргэе. 

12 сарын 4-нд Америкийн The Daily Beast сайтад өгсөн ярилцлагадаа Мена Массуд сэтгэлээ уудалжээ.  

Мена Массуд дэлхийн олон оронд нээлтээ хийж 1 тэрбум долларын орлого олсон Аладдин киноны эрэгтэй гол дүр бөгөөд дараа дараагийн амжилтад нь энэ кино сайнаар нөлөөлнө гэж бодож байсан боловч “Санаснаар болсонгүй” гэж хэлсэн байна.

“Таг суугаад байхаас ч залхлаа. Хүмүүс намайг баахан мөнгөтэй болсон, зөндөө саналд дарагдаж байгаа гэж бодож байгаа. Гэтэл огт тийм биш. Аладдинаас хойш нэг ч кинонд тоглох санал надад ирээгүй. Би ямар Бэтмэнд тоглоё гэсэн биш дээ, ядаж ганц санал ирэх байх гэж найдаж байлаа. Үнэндээ байдал гэвэл ийм л байна. Та бүхний бодож байгаа шиг биш.”

Үнэхээр Аладдины жүжигчдийг сонгох үед ч тэрээр чин сэтгэлээ дэлгэж байсан юм. Түүнтэй цуг тоглосон Наоми Скотт, Вилл Смит нарын хэлж байгаагаар Массуд эцсийн хариу гарахын өмнөхөн “Би энэ дүрд заавал тогломоор байна” гээд нулимс дуслуулсан гэдэг. Эцэст нь 2000:1 өрсөлдөөнд ялж Аладдинд анхны гол дүрээ бүтээхээр болсон билээ. 

Мена Массуд "10 жилийн хичээл зүтгэлийг минь Аладдинаар л үнэлж байгаа бололтой. Цаашдаа ч олон жил Аладдиныг л ярих байх." гэжээ.

Тэрээр Египет гаралтай бөгөөд, 3 настайгаасаа Канадад амьдрах болжээ. Террорист биш дүрд тоглох гэж байдгаараа хичээсэн гэдэг. 

Тэгээд ч ур чадвараа дайчлан байж Аладдинд тоглохоор болсон боловч урьдын адил нэрд гараагүй жүжигчний амьдралаас нэг их ялгарах юм байхгүй байгаа ажээ.  

Телевизийн цуврал  Reprisal, Lamya’s Poem кино нь удахгүй гарах гэж байгаа ч хоёулаа Аладдинаас өмнө зураг авалт нь дууссан, бас аль хэдийн сонгогдсон байжээ. Түүнийг гэх хүмүүс Массудыг энэхүү хана саадыг даван туулж дахин сайн бүтээлд хүч сориосой гэж хүсэн хүлээсээр. 

<Зургийн эх сурвалж: Disney, Mena Massoud жүжигчний инста хуудас>