Кристен Стюартын тоглосон "Усан Доогуур" 1 сард нээлтээ хийнэ

2019-12-18 17:49:27

"Twilight" цувралаар олонд танигдсан жүжигчин Кристен Стюарт "Усан Доогуур" киногоор дэлгэцнээ эргэн ирж байна. Тэрээр хуурай газраас 13кл далайн гүнд нэг сар тэсэх ёстой болсон хайгуулын багийн гишүүн Норагийн дүрд тогложээ. Гэнэтийн газар хөдлөлтийн улмаас шумбагч хөлөгт нь доголдол үүсэж мухардалд орно. Кинонд анх тоглосноосоо хойш зүйл бүрийн дүрд тоглож үзсэн жүжигчин маань энэ удаа халимаг үстэй, эрэлхэг дайчин бүсгүйн дүрд хувирах аж. Тулгарсан саад бэрхшээлийг хэрхэн давах бол гэж фэнүүд нь хүлээсээр сууна.

Найруулагч нь уудам огторгуйд нисч яваа хүний тухай өгүүлсэн "Love(2011)", "The Signal(2014)" кинонуудыг найруулсан Вильям Юбэнк. Харин одоо тэрээр далайн гүний түүхийг харуулах гэж байна.

Вильям Юбэнкийн найруулсан "Усан Доогуур" кинонд далайн гүнийг судалдаг эрдэмтдийн тухай өгүүлж, ажлаа хийж явахад нь газар хөдөлсний улмаас сэрсэн нууцлаг амьтдын аюул заналаас мултарч амь гарахын төлөө хэрхэн тэмцэж байгааг харуулна.

Жүжигчин Венсан Кассель, "Дэдпүл"цувралын Визлийн дүрд тоглосон жүжигчин Ти Жэй Миллер нар ч гэсэн эрс өөр дүрд тоглож үзэгчдийг суудлаас нь өндөлзүүлэхэд бэлэн болжээ.

Сүүлийн үеийн зөгнөлт кинонууд зүгээр нэг ирээдүйн түүхийг өгүүлээд зогсохгүй хүний дотоод сэтгэл рүү өнгийж гүн ухааны өнгө аясыг агуулдаг болсон билээ. Энэ чиг хандлагыг дагаж "Усан Доогуур" кинонд үхэл амьдралын заагт орхигдсон хүмүүсийн зовлон шаналлыг яаж үзүүлэх бол гэдэг нь тун сонирхолтой.

Ойрдоо зөгнөлт кинонууд нэг бол тун амжилттай, нэг бол нэн маруухан дүнтэй байгаа. "Усан Доогуур" ямар дүн авахыг мэдэх цаг ойртсоор байна.

Тус кино 2020 оны 1 сарын 10-нд нээлтээ хийнэ.