Аниргүй Орчин 2 кино 3-р сард нээлтээ хийнэ

2019-12-25 19:58:31

Аниргүй Орчин аймшгийн киноны 2-р анги гарах гэж байна. 1-р ангийг найруулж, гол дүрд тоглосон Жон Красински энэ ангийг бас найруулж, бүр сонирхолтой чимээгүй ертөнцийг үзүүлэхээр бэлджээ. Жон Красински найруулагч анх 2-р анги гаргана гэж бодолгүй зохиолыг бичиж найруулсан боловч 1-р анги амжилттай болж Paramount Pictures компаниас түүнийг ятгасаар байсан тул дараагийн ангийг хийхээр шийджээ.

Өнгөрсөн жил гарсан Аниргүй Орчин кино нь амжилт олох нь тодорхой байсан. Өчүүхэн төдий чимээ гаргахад л аймшигт мангасын дайралтад өртдөг бараан ертөнцийг харуулж анхаарал татсанаас гадна, 1 цаг 30 минут буюу харьцангуй богино хугацаанд хамаг биеэр хүйт оргиулж чадсан билээ.

Тэгээд зогсохгүй эхнэр нөхөр Эмили Блант, Жон Красински нар хамтдаа аймшигт мангасуудаас зугтаж ойн гүнд нуугдан дуу чимээ гаргалгүй амьдарч байгаа Эбботынхны дүрд тоглосон юм. 

Аниргүй Орчин киног бүтээхэд 17 сая доллар зарцуулж, нийт 341 сая долларын орлого олсон нь маш том амжилт байв.  

Эбботынхон мангасуудын сул талыг мэдээд эхний анги дууссан. Дараагийн ангид мангас юунаас болж гарч ирснийг үзүүлэх юм байна. Бас амьд үлдсэн өөр хүмүүстэй уулзах аж. 

Өмнөх ангид тэднийхээс өөр амьд хүн гэвэл эхнэрээ алдсан нэг хөгшин л байсан. Аймшгийг арьс маханд мэдрүүлэх гэж зориуд цөөхөн хүн гаргасан нь тэр.  

Харин дараагийн ангид хэд хэдэн амьд үлдэгсэд гарна гэлцэж байна. Хоёр нь Харанхуйн хөлөг баатар цуврал, Дюнкерк киногоор нэрд гарсан Киллиан Мерфи, Брайан Тайри Хэнри. Тэднийг ямар дүрд тоглохыг хараахан мэдээлээгүй байна.  

Эхний ангийг дүрүүдтэй цуг амьсгаа даран айж үзсэн бол энэ удаа яах бол гэдэг нь мэдээж хүлээх л зүйлийн нэг.

 Аниргүй Орчин 2 кино 2020 оны 3 сарын 20-нд нээлтээ хийнэ.