Bohemian Rhapsody кинонд тоглосон Рами Малек ур чадвараа нотлон харуулсаар байна

2019-12-30 01:25:30

2018 оны шувтаргаар үзэгчид Queen хамтлагаар амьсгалсан билээ. Танил дотно ая дуу, жүжигчдийн чадварлаг жүжиглэлтээрээ үзэгч олны зүрх сэтгэлд хүрсэн Bohemian Rhapsody киноны амжилтын илрэл тэр байв. 

Дэлхий дахинд нэр нь түгсэн Bohemian Rhapsody кинонд Английн алдарт дуучин Фредди Меркури болон түүний домогт Queen хамтлагийн тухай гардаг. Хувь тавилангаар цуглацгаасан гишүүд тарж, дахиад нэгдэх хүртэлх 15 жилийн түүхийг өгүүлдэг. Bohemian Rhapsody ба бусад хит дуунууд нь шигтгээ болон чимсэн тус кино Queen хамтлагийг дурсан санагч үеийнхэн төдийгүй тэднийг сайн мэдэхгүй залуу үеийнхэнд хүртэл таалагдсан нь гайхалтай. 

Хамтлагийн гишүүдтэй тун чиг төстэй дүрүүдээс гадна Bohemian Rhapsody дуу нь дахин дэлхийг доргиосон билээ. 

Bohemian Rhapsody киног амжилтад хүргэхэд чухал үүрэг гүйцэтгэсэн жүжигчин бол яах аргагүй гол дүр Фредди Меркуригийн дүрд тоглосон Рами Малек. Bohemian Rhapsody киногоороо Оскарын шагнал авсан тэрээр Фредди Меркуригийн төрх байдал, дуу хоолой, тайзыг эзэгнэх увдисыг хүртэл маш чадварлаг амилуулж чадсан юм. Шилдэг оддын зиндаанд багтсан хэдий ч 2015 оноос хойш гол дүрд нь тоглож ирсэн USA Network телевизийн Mr. Robot-4 цувралаа дуустал тоглон хэр үнэнч, зүтгэлтэйгээ харуулжээ. Тус кино нь одоо Умард Америкт гарч байгаа. 

2020 онд Рами Малек хоёр блокбастер кинонд тоглоно. Удахгүй нээлтээ хийх зөгнөлт кино Dolittle-д Чи Чи гориллагийн дүрээр үзэгчидтэйгээ уулзана. Хэдийгээр зөвхөн дуу хоолойн жүжиглэлт боловч Роберт Дауни Жүниорын тоглох гол дүр доктор Дүлиттлтэй цуг өнгөрүүлж байгаа хугацаагаараа бусдаасаа хол илүү дүр.  

Мөн Английн алдарт тагнуулч “Жэймс Бонд” цувралын No Time to Die киногоор дэлгэцнээ эргэж ирнэ. Рами Малек өмнөх амьдрал нь нууцлаг эсрэг дүр Сафинд тоглож Жэймс Бондтой ана мана үзэлцэнэ. 

Dolittle 2020 оны 1 сарын 17-нд, No Time to Die 2020 оны 4 сарын 10-нд нээлтээ хийнэ.

Зургийн эх сурвалж: 20th century fox , Universal pictures