2020 онд дэлгэцнээ гарах шилдэг аймшгийн кинонууд
2020-01-05 03:47:58
Аймшгийн кино бол бие арзалзуулж, гарын алганд хөлс дааварлуулж үзэгчдийн сэтгэлийг түгшээн сэрхдийлгэдэг өвөрмөц нэг төрөл. 2019 онд "Бид", "Лоронагийн Хараал", "Аннабелл" гэх мэт олон аймшгийн кино дэлгэцнээ гарч үзэгчдэд хүрсэн билээ.
Тэгвэл шинэ онд ч гэсэн дараа дараагийн аймшгийн кинонууд дэлгэцнээ ээлж дараалан гарах болно.
1. The Grudge / Сүнстэй Байшин/
Хамгийн эхэнд "Сони Пикчерс" -ийн бүтээл Сүнстэй Байшин 1 сарын 3-нд нээлтээ хийж кинотеатруудад гарч байна. Японы аймшгийн кино "Сүнстэй Байшин" киног Америк маягаар дахин бүтээж амжилт олсон киноны дараагийн анги. 2004 онд Сэм Рэйми продюсерлож Умард Америкт л гэхэд 100 сая долларын орлого олж томоохон шуугиан дэгдээж байв. Энэ удаа бас Рэйми найруулагч продюсероор оролцож өмнөх ангийн эрч хүчийг бууруулахгүйн төлөө мэрийх болно. Найруулагчаар 2016 онд "The Eyes of My Mother" аймшгийн киногоор гараагаа эхэлсэн Николас Песке ажиллана.
2. Invisible Man / Үл Үзэгдэгч Хүн
2 сард "Үл Үзэгдэгч Хүн" кино нээлтээ хийнэ. "Хөрөө" цувралын зохиолыг бичиж, "Далд Айдас 3" киног найруулсан найруулагч Ли Уоннелл ажиллахаар болжээ. Get Out(2017), Paranormal Activity(2010) киног бүтээж “бага төсвөөр сайн аймшгийн кино бүтээгч” гэгддэг "Blumhouse Productions" тус киног бүтээж байна.
Энэ кинонд нөхөртөө дарамтлуулдаг Сесилия Касс(Элизабет Мосс) нөхрөөсөө зугтах боловч учир нь үл мэдэгдэх айдас заналхийлэлд автсаар байгаа тухай өгүүлдэг. Трэйлерээс үзвэл, айдаст автсан Сесилия, галзуу нүдээр ширтэх Адриан гарч байгаа нь гүн сэтгэгдэл төрүүлнэ.
3. The Conjuring: The Devil Made Me Do It
“Хараал” киноныхон ч бас шинэ бүтээлээр үзэгчидтэйгээ учран золгоно. Энэ цувралын 3 дахь анги "The Conjuring: The Devil Made Me Do It" киног "Лоронагийн Хараал" киногоор нэр хүндээ өсгөсөн найруулагч Майкл Чавес найруулж байна. "Warner Bros" компаниас тус ангийг 9 сард нээхээр төлөвлөжээ.
“Хараал” цувралд далдын хүч судалдаг эхнэр нөхөр хоёр (Вера Фармига, Патрик Уилсон) сүнс хардаг болсон гэр бүлийнхэн дээр очиж ад чөтгөрийг хөөн зайлуулж байгаа тухай гардаг. “Хараал” киноны шинэ ангийг нэгэн гэр бүлийнхний амийг хөнөөсөн хэрэгт сэжиглэгдсэн этгээд “Ад чөтгөр надаар үүнийг хийлгэсэн” гэж мэдүүлсэн бодит түүхээс сэдэвлэн бүтээсэн бөгөөд, гарцаа байхгүй сонирхолтой бүтээл болох биз ээ.
