“Аватар 2” кино 2021 онд нээлтээ хийхээр болжээ
2020-01-11 02:51:15
Шинжлэх ухаан, уран зөгнөлт кино төрөлд домог болсон “Аватар” киноны дараагийн анги гарахаар болжээ.
Жэймс Камерон найруулагчийн 2009 онд найруулсан “Аватар” кинонд ойрын ирээдүй, дэлхийн энергийн хомстлын асуудлыг шийдэхийн тулд Пандора гараг дээр Навичуудтай тулалдаж буй хүн төрөлхтний тухай өгүүлдэг. Дэлхий даяар 2,743,000,000 долларын орлого олсон гайхалтай амжилт тогтоож, нээлтээ хийсэн үеэс дараагийн анги сонирхол татаж эхэлсэн.
“Аватар 2” кино 2014 онд нээлтээ хийхээр төлөвлөж байсан боловч өнөөг хүртэл нээлт хийх өдрөө 5 удаа хойшлуулж, үзэгчдийн урмыг хугалаад байна. Хойшлох болсон шалтгааны талаар Жэймс Камерон найруулагч эх зохиол удаашралтай байгаа, компьютер графикийн технологи бүрэн бус байгаатай холбоотой гэж тайлбарласан. Үүнээс гадна “Аватар 2” киноны хөгжмийн зохиолч Жэймс Хорнер онгоцны ослоор нас барсан зэрэг олон асуудлууд давхацсаны улмаас киноны нээлт хойшлогдсон ажээ.
1-р сарын 7-ны өдөр Лос-Анжелес хотноо зохион байгуулагдсан “CES 2020 (Consumer Electronics Show)” -д “Мерседес Бенз” компани нь “Аватар” киноноос сэдэвлэсэн “Vision AVTR” -ийг танилцуулсан байна. Мөн тус өдөр “Аватар” -ын албан ёсны олон нийтийн сүлжээ хаягт “Аватар 2" киноны арт зургуудыг нийтэлжээ.
Уг зурагт нэр нь үл мэдэгдэх гарагийн хөх тэнгис болон тэнгэрийг ширтэн харах аватаруудыг араас нь харуулсан байна.. Өнгөцхөн харахад л графикийн дэвшил, нэг шат шинэчлэгдсэн киноны баатрууд үнэхээр сонирхол татаж, хүлээлт үүсгэж байна.
“Аватар 2” кинонд Навичуудын нэг болсон Жэйк Салли(Сэм Уортингтон), Нейтири(Зои Салдана), эсрэг дүр хурандаа Майлз Куоритч(Стивен Лэнг) дахин гарч ирэх болно. Мөн жүжигчин Кэйт Уинслет, Вин Дизель нар "Аватар 2" кинонд дүр бүтээжээ. Эхний ангиас хойш цаг хугацаа өнгөрч Жэйк, Нейтиригийн гэр бүл гарч, ирээдүйн талаар өгүүлэх шинэ үйл явдал өрнөх ажээ.
“Дисней” компани “Аватар 2” киноны албан ёсны нээлтийн өдрийг 2021 оны 12-р сарын 17 гэж зарласан. “Аватар” цуврал дахин 3 анги хийгдэх ба 3-р ангийг 2023 онд, 4-р ангийг 2025 онд, 5-р ангийг 2027 онд нээхээр төлөвлөж байгаа ажээ.
