“ТЕНЕТ” киног үзэхээр зэхэж буй үзэгчиддээ хүргэх зөвлөмж
2020-08-14 00:40:44
Найруулагч Кристофер Нолан нь сүүлийн үед “Dunkirk”, Interstellar”, Inception”, “Memento” зэрэг кинонуудаараа метафизик өнгө аяс, цаг хугацааны нууцыг өгүүлэн үзэгчдийн гайхшралыг төрүүлээд байгаа. Түүний цаг хугацааны тухай өвөрмөц шийдэлтэй бүтээлүүд олны хүртээл болох бүрд үзэгчид ихээхэн догдолж, түүнчлэн олон янзын тайлбарууд, сэтгэгдлүүд ар араасаа хөвөрдөг билээ. Тиймээс ч Найруулагч Ноланы удахгүй дэлгэцнээ нээлтээ хийх шинэ бүтээл “ТЕНЕТ” киноны талаар ихийг мэдэхийг хүсэж буй үзэгчдэд сонирхуулан, уг киног ойлгоход тус болох зөвлөмжийг хүргэж байна.
“ТЕНЕТ” кино өмнөх бүтээлүүдтэй мөн адил цаг хугацааны талаарх түүхийг өгүүлэх аж. Тус кинонд дэлхийн 3-р дайныг зогсоохын тулд ирээдүйн дайралтыг сөрөн зогсож урвуу цаг хугацааны урсгалыг ашиглан өөрчлөх түүхийг харуулах болно. Гэвч энэ нь цаг хугацааны машиныг ашиглан цаг хугацааны аялал хийх болон өнгөрсөн, одоо, ирээдүй рүү ирж очих шилжилтээс эрс ялгаатай ойлголт юм.
Киноны үйл явдал нь ирээдүй болон өнгөрсөнд орших эсрэг талуудын тулааныг үзүүлнэ. Энэ тэмцэлдээ эд зүйлсийн энтропыг эсрэг чиглэлд эргүүлэн цаг хугацааг урвуу болгодог хувиргагчийг ашиглах бөгөөд тус ойлголтоор харьцангуйн онол, зэрэгцээ ертөнц, grandfather paradox гэсэн философи болон шинжлэх ухааны олон онол ухагдахуунуудыг уялдуулсан байна.
Албан ёсны трэйлерт “Тенет, энэ үг зөв замыг нээнэ, зарим буруу замыг ч бас” гэж гардаг. "Тенет" нь өнгөрснийг өөрчлөх гэсэн эрх мэдэлтнүүдээс дэлхийг хамгаалахаар ирээдүйд байгуулагдсан нууц байгууллага бөгөөд өнгөрсөн цаг хугацаанд гаргасан шийдвэр нь тэдний ирээдүй байх болно.
Найруулагч Нолан ““Тенет” кино ойлгомжгүй, төвөгтэй боловч толгойдоо үргэлжлүүлэн ургуулан бодох боломжтой. “Тенет”-ийг бүрэн ойлгоно гэдэг нь тус кино үзэгчдийн толгойд үргэлжлүүлэн бодогдож, үзэгчид олон боломжийн талаар бодох ёстой хэрэгцээг хүлээн зөвшөөрч байгаа гэж ойлгож болно.” хэмээн тайлбарлажээ. Кеннет Брана “Өнөө хүртэл уншсан киноны зохиолоос хамгийн олон дахин уншсан нь “Тенет” байсан. Сонин дээрх үгийн сүлжээг бөглөж байгаа мэт санагдсан. Гэвч үзэгчид тус киног үзэхийн тулд мэргэжилтэн болох шаардлагагүй” гэж хэлсэн нь сонирхлыг төрүүлж байна.
“Тенет” нь дээрэмтэй кино дээр тагнуултай тулаантай киног хослуулсан мэт мульт жанрын тулаантай блокбастер кино бөгөөд коронавируст цар тахлаас хойш нээлтээ анх удаа хийж байгаа Холливудын блокбастер кино гэдэг нь ихээхэн анхаарал татаж байна. Түүхэнд хамгийн олон буюу дэлхийн 7 улсад IMAX болон 70 мм-ийн камераар зургийг нь авч, өмнө нь байгаагүй нарийвчлалтай орон зайг давсан тагнуулын дайныг бүрэн харуулжээ. Кино түүхэн дэх хамгийн том зураг авалтын задгай талбайг барьж, компьютер графикаар бус, бодитоор Boeing 747 онгоц болон нисэх онгоцны байрыг дэлбэлж зураг авсан байна.
2020 оны хамгийн их хүлээлт үүсгээд буй "Тенет" нь найруулагч Кристофер Ноланы үзэгчдэд хүргэх шилдэг бүтээл юм. Тус кино нь 2D, 4DX, IMAX зэрэг форматаар кино театрын дэлгэцнээ үзэгчдийн хүртээл болох юм.
“Тенет” кино нь 9 дүгээр сарын 11-нд нээлтээ хийх товтой байна.
