“Шинэ Мутантууд” кино коронавируст халдвараас хойш Америкт хамгийн амжилттай нээлтээ хийжээ. Гэхдээ үнэлгээ нь?

2020-09-03 16:14:03

“Икс-Хүмүүс” цувралын шинэ анги “Шинэ Мутантууд” кино Умард Америкт коронавируст халдвараас хойш олны хүртээл болсон шинэ бүтээлүүдээс хамгийн өндөр амжилттайгаар нээлтээ хийсэн киногоор тодорлоо. 8-р сарын 31-ний өдөр “Variety” зэрэг мэдээллийн сайтуудад нийтэлснээр 8-р сарын 28-нд Умард Америкт нээлтээ хийсэн “Шинэ Мутантууд” кино 7 сая долларын нээлтийн орлого олж, боксоффист нэгээр гарч иржээ. Одоо Умард Америкт коронавируст халдварын улмаас нийт кино театруудын 62% нь үйл ажиллагаагаа явуулж байгаа бөгөөд нийт суудлын 25-50%-ийн танхим дүүргэлттэйгээр ажиллаж байгаа юм. 

Тус нийтлэлд өгүүлснээр “Шинэ Мутантууд” кино нь кино театр хэвийн үйл ажиллагаа явуулж байсан бол 14 гаруй сая долларын нээлтийн орлого олох байсан гэж таамаглаж байгаа аж. Гэвч “Шинэ Мутантууд” кино ийм хэмжээний орлоготой байгаа ч хэвлэл мэдээллийнхний үнэлгээ янз бүр байна. “Variety” сайт “нэмэлт зураг авалт хийж, засаж янзалсан тал нь дажгүй, зарим хэсэг нь сайн биш байна.” гэж үнэлжээ. “LA times” сайт “Супер баатрын франчайзд дөхөх олон янзын арга барил байна” гэж тайлбарлан сайн гэсэн үнэлгээ өгчээ. “Шинэ Мутантууд” кино супер баатрын жанрыг аймшгийн киноны жанртай хослуулсныг нь сайнаар үнэлсэн байна. 

Тус кинонд нууц байгууламжид хоригдсон дийлдэшгүй хүч чадлаа хэрхэн удирдахыг мэдэхгүй өсвөр насны Мутантууд өөрсдийн айдастайгаа нүүр тулж байгаа тухай өгүүлдэг. Анх 2018 оны 4-р сард нээлтээ хийхээр төлөвлөж байсан боловч нэмэлт зураг авалт хийх шалтгаанаар хойшлуулсан байна. Улмаар 2019 оны 2-р сард, мөн 2020 оны 4-р сар гээд нээлтээ байнга хойшлуулж байгаад коронавируст халдварын тархалтын улмаас 2020 оны 8-р сарын 28-ны өдөр болгон хойшлуулжээ. 

“Шинэ Мутантууд” кино кино театруудаар одоо гарч байгаа.