Коронавируст халдвар намжтал “Веном 2” киног үзэх боломжгүй
2020-09-22 10:59:45
“Sony Pictures Entertainment” компанийн ерөнхийлөгч Тони Винсикерра саяхан зохион байгуулагдсан “Bank of America Virtual 2020 Media, Communications & Entertainment Conference”-ийн үеэр “Кино театрууд нээгдэн үйл ажиллагаа нь бүрэн жигдрээгүй л бол 200 сая долларын киног зах зээлд нийлүүлэх алдаа гаргахгүй” гэж хэлжээ. Түүний дурдсан 200 сая долларын кино гэдэг нь саяхан нээлтээ хийсэн Кристофер Нолан найруулагчийн “ТЕНЕТ” кино аж. Тус кино нь коронавируст халдвар тархсанаас хойш нээлтээ хийсэн Холливудын блокбастер анхны кино бөгөөд Америкт кино театруудын үйл ажиллагаа зогссон байгаа ч хилийн чанадад нээлтээ хийсэн.
Нээлтээ хийхээр төлөвлөж байгаа “Sony Pictures”-ийн блокбастер кино бол жүжигчин Том Хардигийн гол дүрд нь тоглосон “Веном 2” юм. Анх 2020 оны 10-р сард нээлтээ хийхээр төлөвлөж байсан тус кино ирэх жилийн 6-р сарын 25-ны өдөр нээлтээ хийхээр хойшлуулсан. 2018 оны 10-р сард олны хүртээл болсон “Веном” кинонд сурвалжлагч Эдди Брок(Том Харди) нь харь гарагийн симбиотын голомт болсноор Марвелын анхны хорон санаатан Веном төрдөг тухай өгүүлсэн тулаант блокбастер кино бөгөөд дэлхий дахинаа ихээхэн орлого олсон аж.
