“Юрийн Галавын Ертөнц: Ноёрхол” зураг авалтаа түр зогсоожээ

2020-10-13 11:06:35

Америкийн “Variety” сайтын мэдээлснээр “Юрийн Галавын Ертөнц: Ноёрхол”  киноны зураг авалтын талбайд коронавируст халдвар тархаж, шинжилгээний хариу эерэг гарсан хүмүүс илэрч, зураг авалтыг түр зогсоосон байна. Колин Треворроу найруулагч үүний талаар мэдээлэхдээ.

Колин Треворроу найруулагч ““Юрийн Галавын Ертөнц: Ноёрхол” кино зураг авалтын газарт ажиллаж байсан хэд хэдэн хүнээс коронавируст халдвар илэрсэн. Удалгүй бүгдийнх нь хариу сөрөг гарсан боловч аюулгүй ажиллагааны журмын дагуу хоёр долоо хоног кино зураг авалтыг зогсоосон.” гэж мэдэгдсэн. Үүний талаар Юниверсал Пикчерсийн хэвлэлийн төлөөлөгч “Өнгөрсөн шөнө “Юрийн Галавын Ертөнц: Ноёрхол” кино багийн гишүүдээс коронавируст халдварын хариу эерэг гарсан гэсэн мэдээ авсан. Хоёр дахь шинжилгээгээр сөрөг хариу гарсан боловч, жүжигчдийн болон киноны багийн аюулгүй ажиллагаа, нийгмийн хариуцлага юу юунаас илүү чухал учраас эерэг хариу авсан хүмүүс болон хавьталд орсон хүмүүс өөрсдийгөө тусгаарлаад байгаа.” гэж уламжилжээ.

Тус кино нь 2020 оны 3-р сард коронавируст халдвар дэлхий даяар тархсан тэр үеэр зураг авалтаа эхлүүлсэн боловч төд удалгүй хэдэн сараар зогсоогоод, дахин үргэлжлүүлэн ажиллаж байсан. Тус кино 2022 оны 6-р сарын 10-ны өдөр нээлтээ хийхээр төлөвлөж байна. 

Зургийн эх сурвалж: Universal pictures