“Сүнсний Ертөнц”анимэйшн нь 2021 оны Оскарт өрсөлдөхүйц бүтээл болсон уу?

2020-10-22 02:31:25

“Сүнсний Ертөнц” анимэйшн нь “Rotten Tomatoes”-т 100%-ийн шинэлэг байдлын рекорд тогтоож, гаднын шүүмжлэгчид магтахын зэрэгцээ 2021 оны Оскарт  хүчтэй өрсөлдөгч байна хэмээн яригдаж байна. 

“Сүнсний Ертөнц” анимэйш(найруулагч Пит Доктер)-ийг гаднын кино шүүмжлэгчид ар араасаа магтсанаар кино сонирхогчдийн гол ярианы сэдэв болж байна. Тус кинонд дунд сургуулийн хөгжмийн хамтлагийн багш Жоу Гарднерт Нью-Йорк хотын хамгийн шилдэг жааз клубт тоглох боломж гардаг боловч, гэнэтийн ослын улмаас сүнс нь хойд насанд очихын өмнөх үед очдог. Тэнд амьдралын хамгийн чухал зүйл юу болохыг нээн илрүүлдэг тухай өгүүлэх ажээ.

“Дисней-Пиксар” компанийн өмнөх бүтээлүүдээс харж байгаагүй шинэлэг байдлыг илүү харуулсан тус анимайшнийг үзсэн хэвлэлийнхэн “Үнэхээр шинэлэг хэрнээ Пиксар өөрийн онцлогийг амилуулжээ(DEADLINE)”, “Нууцлаг, сонирхолтой шийдлээр Пискар өөрийн мэдрэмжийг сайн шингээсэн кино болжээ(INDIEWIRE)”, “Аргагүй л Пиксар! Амьдралын онцгой месежийг өгүүлсэн Пиксарын гайхалтай адал явдал(THE HOLLYWOOD REPORTER)” гэх зэргээр сайшаажээ. 

“Empire magazine” –т “Хүн хэмээн оршихуйн сайхан хийгээд таатай аялал! Төсөөлшгүй гайхалтай байдлаар дүүрэн байлаа” гэж үнэлэн, бүх үеийнхнийг байлдан дагуулах анимэйшний хосгүй бүтээл болжээ гэж мэдэгдсэн байна.

Америкийн “Variety” сайт “Сүнсний Ертөнц” анимэйшн 2021 оны Оскарт хүчтэй өрсөлдөгч байх нь гэж уламжилжээ. Тус анимэйшнийг найруулсан Пит Доктер “Up”, “Inside out” анимэйшнээр 82, 88 дахь Оскараас “Шилдэг анимэйшн” шагнал хүртэж байсан. Харин түүний шинэ бүтээл болох “Сүнсний Ертөнц” нь Оскарт нэр дэвшиж шагналын цомд түүнийг дахин нэг удаа хүргэх эсэх нь анхаарал татаж байна.

“Сүнсний Ертөнц” анимэйшн нь 73 дахь удаагийн Каннын кино наадамд албан ёсоор уригдсан кинонуудын нэгээр сонгогджээ.  

Зургийн эх сурвалж: Disney