Диснейн 2021 оны анхны уран зөгнөлт, адал явдалт анимэйшн... “Raya and the Last Dragon”

2020-10-27 01:05:39

Диснейн студи 2021 онд нээлтээ хийх уран зөгнөлт, адал явдалт “Raya and the Last Dragon”(Найруулагч Дон Холл, Карлос Лопес Эстрада) анимэйшнийн анхны трэйлер, постерыг дэлхий дахинаа нэгэн зэрэг цацжээ. Тус трэйлерт Диснейн шинэ дүр Раяа болон Кумандра арлын үзэсгэлэнт байдал нь анхаарал татаж байна. “Raya and the Last Dragon” кинонд аюулд унасан хаант улсыг аврахын тулд төрсөн цагаасаа эхлэн шилдэг дайчин болохоор бэлтгэгдэж ирсэн Раяа нь сүүлчийн лууг олж, улс орондоо энх тайван байдлыг тогтоох зорилготой аялалд гарна.

Ялангуяа “Намайг Раяа гэдэг.” гэж хэлдэг нь Диснейн уран зөгнөлт, адал явдлыг авч явах шинэ дүр Раяа гэдгийг харуулж байгаа нь хүлээлт үүсгэж байна. Түүний хамтрагч Төк-Төкийн хайр татам хөгжилтэй байдал нь мөн сонирхол татаж байна. Мөн трэйлерээс өмнө цацагдсан тус киноны албан ёсны постерт луугийн эрдэнийн чулууны хамгаалагч болохоор бэлтгэгдсэн тэрээр шийдэмгий зогсолттой нүүрээ халхлан зогсох дайчин дүр төрхөөр анхаарлыг татаад байсан. 

“Оддын дайн” цувралд Роуз Токигийн дүрийг чадварлаг бүтээж, үзэгчдэд өндөр сэтгэгдэл үлдээсэн Келли Мари Трэн нь аюулд унасан  Кумандрад энх тайван байдлыг тогтоох дайчин Раяа бүсгүйн дууг оруулсан ажээ. Мөн “Crazy Rich Asians”, “Ocean’s 8” кинонд тоглосон Аквафина нь усны луу буюу хүн дүрст хувирагч Сису луугийн дүрд дуу оруулах аж. Түүгээр ч зогсохгүй “Moana”, “Frozen” зэрэг дэлхийн шилдэг Диснейн анимэйшнийг бүтээсэн багийнхан тус бүтээл дээр ажиллаж байгаа нь шинэлэг уран зөгнөлт, адал явдалт кинонд дурлагсдын дунд өндөр хүлээлт үүсгэж байна. 

Зургийн эх сурвалж: Disney