Дисней Плас, Вакандаг харуулсан spin-off бүтээнэ

2021-02-03 00:00:54

Жүжигчин асан Чедвик Боузмангүй “Black Panther”-ийн spin-off цувралыг “Дисней Плас” бүтээнэ.

Америкийн “Variety” сайтад “Black Panther”-ийн Райан Куглер найруулагч Вакандаг харуулсан цувралыг “Дисней Плас”-аас хөгжүүлж байгаа гэж нийтэлжээ. Тус нийтлэлээс харахад, Райан Куглер найруулагч “Уолт Дисней” компанитай гэрээ байгуулж, олон жилийн турш үргэлжлэх телевизийн шинэ цуврал, төслүүдийг хөгжүүлж байгаа ажээ. Тус цуврал нь Райан Куглерийн Диснейтэй байгуулсан шинэ таван жилийн гэрээний олон төслүүдийн нэг аж. Райан Куглер найруулагч одоо “Black  Panther" киноны үргэлжлэлийг бүтээж байгаа билээ.

Диснейн ерөнхийлөгч Боб Айгер “Райан Куглер бол алсын хараатай, өргөн цар хүрээтэй хардаг кино найруулагчийн нэг. “Black Panther” бүтээлээрээ цоо шинэ түүх болон бэлгэдэлт дүрийг бодитой, утга учиртай, санаанд хоногших арга барилаар тод дамжуулан бүтээсэн. Бидний харилцаа илүү бэхжиж байгаад баяртай байгаа бөгөөд Райан болон түүний багтай хамтдаа илүү гайхалтай түүхийг бүтээх болно гэж найдаж байна” хэмээжээ.  “Black Panther” кино 2018 онд олны хүртээл болж, маш их нэр хүндийг олсон. 2020 оны 8-р сард жүжигчин асан Чедвик Боузман бүдүүн гэдэсний хорт хавдраар хорвоог орхисон ч, түүний дүрд шинээр шалгаруулалт явуулалгүйгээр, цувралыг үргэлжлүүлж байгаа билээ.