Марвелын энэ жилийн хамгийн сүүлийн бүтээл “Хүн-Аалз: Буцах замгүй” киноны албан ёсны трэйлер цацагдлаа

2021-08-26 10:06:58

“Sony Pictures” компани 2021 оны 8-р сарын 24-ний өдөр “Хүн-Аалз: Буцах Замгүй” кино 12-р сард нээлтээ хийнэ гэж мэдэгдээд teaser trailer-ийг цацжээ. Тус трэйлерт “Хүн-Аалз: Гэрээсээ Холдсон нь (2019)” кинонд Мистерио, Питер Паркер(Том Холланд)-ын хувийн мэдээллийг тарааснаар эхэлдэг. Питер найз бүсгүй МЖ(Зендея Коулман)-тэй хамт дээш харан хэвтээд өөрийнхөө тухай буюу хүн аалзын талаар ярилцдаг. Улмаар Мистериог алсан гэмт хэрэгтэн гэж цагдаагийн газар байцаагдах аж. Дэлхийг аварсан баатраас гэмт хэрэгтэн болчих ажээ. Түүний хэн гэдэг нь илчлэгдсэнээр, олны анхааралд өртдөг. Түгшүүртэй, таагүй харагдаж байгаа хэрнээ ойр орчиндоо санаа зовох аж.

Эцэст нь Питер Доктор Стрэнж дээр очиж, хүмүүс түүнийг хүн аалз гэдгийг нь мартуулах шившлэг хийж өгөхийг хүсдэг. Хэтэрхий аюултай гэж Вонг зогсоох гэсэн хэдий ч Питерийн чин сэтгэлийн гуйлтыг нь зөвшөөрч Доктор Стрэнж шившлэг хийж эхэлдэг. Гэвч тэдний оролдлого буруугаар эргэж, орон зайн тэнцвэрийг алдагдуулдаг. Гоблины шидсэн гэлтэй бөмбөг дэлбэрэх ба хорон санаат “Доктор Октавиус“ мэндчилэн гарч ирж цочоодог. Гуравхан минутын богинохон бичлэг боловч сонирхолтой түүх нь дэлгэцээс харц үл салгам.

“Хүн-Аалз: Буцах Замгүй” кино 2021 оны 12-р сарын 17-ны өдөр нээлтээ хийнэ. 

Зургийн эх сурвалж: Disney