“Нил мөрөн дэх аллага ” кинонд дэлхий дээр 4-хөн байдаг камераар Египетийн байгалийн үзэмжийг авчээ

2022-01-14 12:54:58

Агата Кристигийн шилдэг борлуулалттай зохиолоос сэдэвлэн бүтээсэн “Нил мөрөн дэх аллага” кинонд дэлхий дээр 4-хөн байдаг 65 мм-ийн хальстай камераар зургийг нь авсан тухай кино зураг авалтын явцын танилцуулга бичлэгээр олон нийтэд цацжээ.

65 мм-ийн хальстай камер нь энгийн хальстай камер(35 мм )-тай харьцуулахад 2 дахин нягтралтай, дүрсийг илүү тод харуулдаг. Гайхалтай дэлгэцийн бүтээлийн гоо зүйг харуулсан “Tenet”, “Dunkirk” кинонд ч бас 65 мм-ийн хальстай камерыг ашиглажээ. “Нил мөрөн дэх аллага” кинонд харуулах үзэгдлүүд нь маш их хүлээлтийг үүсгээд байна. 

Кинонд Египетийн харийн мэт байгалийн үзэмж, гайхамшигтай сүндэрлэх сүм дацан, Карнак хөлөг дээрх тансаг үдэшлэг, 1930-аад оныг санагдуулам байдлыг онцгойлон дэлгэцээр харуулах ажээ.

Киног найруулахын зэрэгцээ дэлхийн алдартай мөрдөгч Эркюль Пуарогийн дүрийг бүтээсэн Кеннет Брана “Бодит ертөнцөөс тусгаарлаж, кинон дотор оруулна. Хүчтэйгээр өөртөө татаж, уран сайхныг мэдрүүлэх болно” гээд кинонд харуулах дэлгэцийн бүтээлийн тансаг гоо зүй, нарийвчлал нь өөр байх болно гэдгийг итгэлтэйгээр хэлсэн байна.

“Нил мөрөн дэх аллага” кинонд шинэхэн хосыг суулгасан Египетийн Нил мөрөн дээрх тансаг усан онгоцонд хүн амины хэрэг гарч, мөрдөгч “Эркюль Пуаро” мөрдлөгийг хүлээн авсан боловч, дахин хүн амины хэрэг гарснаар зорчигчид бүгд цочролд орж, эмх замбараагүй байдал үүсдэг тухай өгүүлэх ажээ.

Тус кино 2022 оны 2-р сарын 25-ны өдөр нээлтээ хийнэ.  

Эх сурвалж: Дисней