Том Крузын гол дүрд нь тоглосон “Биелэгдэшгүй даалгавар 7” кино 2023 оны зун нээлтээ хийнэ
2022-05-30 15:07:28
Удаан хүлээлгэсний эцэст 2023 оны зун нээлтээ хийхээр болсон “Биелэгдэшгүй даалгавар” цувралын 7 дахь бүтээл “Mission: Impossible – Dead Reckoning Part One” нэрээр гарах ба “Dead Reckoning” нь “чиглүүлэгч” гэсэн утгатай аж. Энэ нь газар дээр зорилтот бай нь байхгүй далайн мандал болон элсэн цөл зэрэг газарт ашигладаг зам заагчаар гаднын системд тулгуурлахгүйгээр зөвхөн удирдлагын хөдлөх, хүрэх газрыг холбосон шугамаар маршрутыг шийдэхийг хэлдэг.
“Шүүлт” гэсэн утгатай “Reckoning”-аар өнөөг хүртэл биелэгдэшгүй даалгаврыг гүйцэтгэж ирсэн Итан Хант(Том Круз)-ыг шинэ даалгавар, шүүлт хүлээж байгааг тааварлаж болох юм. “Сайн, муу гэдгийг одооноос бид шийднэ. Аль талд нь зогсохоо шийд” гэж хэлэх Южин Киттриж(Хенри Черни)-ийн хэлэх үгийн хамт Итан Хантын зүрх түгшээх тулаан өрнөх ажээ. Южин Киттриж нь “Mission Impossible 1”(1996)-д Олон Улсын Валютын сан(IMF)-ийн даргын дүрээр гарч байсан бол энэхүү 7 дахь бүтээлд ямар түүхийг өгүүлэх нь сонирхол татаж байна.
Мөн Итан Хантын багийн Ильза(Ребекка Фергюсон), Бенжи (Саймон Пегг), Лютер(Винг Рэймс) болон шинээр “Авенжерс” цувралын Пом Клементьюфф бас гарах ажээ. Богино трэйлерт цохионы замаар мотоциклтой давхих Итан Хантын дүр төрх нь бидний сэтгэлийг өнөө хүртэл түгшээж байсан “Биелэгдэшгүй даалгавар” цувралын тусгай ажиллагаа эхэлснийг зарлах гэлтэй. Энэ удаагийн цувралд ч бас Том Круз орлон тоглогчгүйгээр бүх тулааныг өөрөө гүйцэтгэжээ.
Тус киноны найруулагчаар Кристофер Маккуорри ажилласан байна. Тэрээр “Mission: Impossible – Rogue Nation”, “Mission: Impossible – Fallout” гээд “Биелэгдэшгүй даалгавар” цувралын 3 дахь бүтээлээ ийнхүү найруулж байна. Өнгөрсөн 26 жилд ганц ч удаа алдаа гаргаагүй, амжилттай гүйцэтгэж ирсэн дэлхийн шилдэг тулаант франчайз киноны 7 дахь цувралыг 2023 оны зун үзэх нь ээ.
