Далайн эрэг дээрх Барби хосууд хэн байв?

2022-07-08 14:20:37

Холливудын од Райан Гослинг 2022 оны 06 сарын 27-ны өдөр Америкийн нэгэн далайн эрэг дээр тод ягаан хувцастай гарч ирэв. Тод эрээн хувцастай эмэгтэй жүжигчин Марго Роббитой хамт дугуйтай тэшүүрээр гулгаж байгааг далайн эрэг дээр ирсэн иргэд харан зургийг нь авцгаасан байна. Энэ бол “Барби” киноны зураг авалтын нэг хэсэг юм. Гослинг энэ кинонд барбигийн эрэгтэй найз Кений дүрийг бүтээжээ. 2022 оны 06 сарын 28-ны өдөр оддын тухай мэдээллийг хүргэдэг “People” гэх зэрэг сайтын мэдээлснээр “Барби” киноны багийнхан өмнөх өдөр нь Лос-Анжелесийн Венис далайн эрэг дээр энэхүү зургийг авчээ. “Барби” нь тоглоом худалдаалдаг Маттел компанийн алдартай хүүхэлдэй барбигийн тухай өгүүлэх кино юм. Барби Ландад амьдардаг барби хүүхэлдэй төгс биш гэдэг шалтгаанаар сургуулиас хөөгдөж бодит ертөнц рүү адал явдалт аялалд гарч буй талаар өгүүлэх ажээ. 

Кино бүтээгч “Warner bros” компани саяхан хүүхэлдэй шиг мэдрэмжийг төрүүлэх хувцастай Гослингийн зургийг олон нийтэд дэлгэжээ. Цагаан үстэй Гослинг булчинлаг биен дээрээ жинсэн хантааз өмсөн Кентэй ав адилхан гэдгээр бахархсан байна. “LaLa Land” (2016)-д бүтэлгүй хайрын эзэн жааз төгөлдөр хуурч Себастьяны дүрийг бүтээж шүтэн бишрэгчдийнхээ хайр хүндлэлийг хүртсэн Гослинг энэ удаад Кений дүрээр өөр нэгэн жүжиглэлтийг харуулах ажээ. “Little Women”, “Lady Bird” киноны зохиолыг бичиж, найруулагчаар нь ажилласан Грета Гервигний ээлжит бүтээл “Барби” кино 2023 оны 07 сарын 21-ний өдөр нээлтээ хийнэ.