Лэди Гага, “Joker: Folie à Deux” кинонд тоглохоо албан ёсоор мэдэгдэв...

2022-08-16 10:11:27

2022 оны 8-р сарын 05-ны үдээс өмнө Лэди Гага өөрийн твиттертээ “Joker: Folie à Deux” киноны 18 секундийн бичлэгийг оруулсан байна. Тус бичлэгт Жокер (Хоакин Феникс), Лэди Гага нарын бүжиглэж байгааг сүүдрээр нь дүрслэн харуулжээ. 2022 оны 6-р сараас киноныхны дунд Лэди Гага, Харли Квинний дүрд тоглохоор яригдаж байгаа гэсэн цуу тархаад байсан билээ.

Цуу яриа тарснаас хойш Лэди Гага ямар нэгэн мэдэгдэл хийгээгүй ирсэн боловч, тус өдөр пост оруулж өөрийгөө кинонд тоглоно гэдгээ албан ёсны болгосон байна. 2019 онд нээлтээ хийсэн “Жокер” киногоор Хоакин Феникс 77 дахь удаагийн “Алтан бөмбөрцөг” наадмаас “шилдэг эрэгтэй жүжигчин”, 92 дахь удаагийн “Оскар” шагнал гардуулах ёслолоос “шилдэг эрэгтэй жүжигчин” зэрэг шагналын эзэн болж, кино шүүмжлэгчдээс магтаал, үзэгчдээс алдар хүндийг хамтад нь хүртсэн билээ. Тус киног өмнөх ангийг нь найруулсан Тодд Филлипс дахин найруулахаар болсон ба мюзикл кино байх болно гэж мэдэгдээд байгаа.

Өнөөг хүртэл Харли Квинний дүрийг “Suicide Squad” (2016), “Birds of Prey” (2020), “The Suicide Squad 2” (2021) зэрэг кинонуудад жүжигчин Марго Робби гурвантаа бүтээсэн байна. “A star is born”, “House of Gucci” зэрэг киногоор жүжиглэх чадвараа харуулсан Лэди Гагаг Марго Роббигийн дараагийн шинэ Харли Квинний дүрийг хэрхэн бүтээх бол гэдэг нь кинонд дурлагсдын анхаарлыг татаж байна. 

“Joker: Folie à Deux” кино 2024 оны 10-р сарын 04-ний өдөр нээлтээ хийхээр болжээ. 

Зургийн эх сурвалж: Warner bros