Дисней компани “Араатны Хаан Арслан” киноны дараагийн ангийг бүтээнэ

2020-10-06 22:08:58

Уолт Дисней компани “Араатны Хаан Арслан” киноны дараагийн ангийг найруулах найруулагчийг сонгож, цуврал бүтээл болохыг албан ёсоор мэдэгджээ. 

9-р сарын 29-ний өдөр Америкийн “Deadline” сайтад “Араатны Хаан Арслан киноны дараагийн ангийн эх зохиолын драфт бэлэн болсон.”, “Тус кинонд араатны хаан Симбагийн аав Муфасагийн тухай өгүүлнэ.” гэж нийтэлсэн байна. 2019 онд олны хүртээл болсон “Араатны Хаан Арслан” кино нь 1994 онд бүтээгдсэн анимэйшнийг бүрэн хэмжээний кино болгож, 1.66 тэрбум долларын орлого олсноор дэлхий дахинаа өндөр амжилтыг тогтоосон.

“Араатны Хаан Арслан” киноны дараагийн ангийг өмнөх ангитай мөн адил “photo reality” технологийг ашиглан бүтээх ажээ. “Photo reality” гэдэг нь компьютер графикийн технологи болон харагдах байдлын тусгай үр дүн ашиглан бодит киноноос ялгаагүйгээр үзэгдлийг бүтээхийг хэлдэг. Тус киноны найруулагчаар “Moonlight” киногоор Академийн шагнал хүртсэн найруулагч Барри Женкинс ажиллах ажээ. 

Зургийн эх сурвалж: Disney