Ээдрээтэй хувь тавилангаар удирдуулсан зам “Муфаса”
2024-12-18 09:33:18
1994 онд олны хүртээл болсон Дисней анимэйшний “Араатны хаан Арслан” нь урьдын адил алдартай бүтээлүүдийн нэгээр тооцогдоод байна. Зовлон бэрхшээлийг ялж, эцэст нь хаан болсон Симба арслангийн тухай өгүүлэх түүх олон хүмүүсийн сэтгэлийг хөдөлгөсөн.
“Араатны хаан Арслан”-д Симбатай адил сэтгэлд үлдэхүйц арслан гарч ирдэг. Тэр бол Симбагийн аав, Африкийн хаант улсыг захирч байсан Муфаса хаан юм. Муфаса бол зоригтой, нинжин сэтгэлтэй аав бөгөөд шударга бус зүйлийг хатуу захирдаг жинхэнэ хаан байсан. Хаан эрхийг булаан авах гэдэг дүү Такагийнхаа арга мэхэнд орж, эцэст нь амиа алддаг.
Муфаса, Така ах дүүгийн түүх “Араатны хаан Арслан”-г холбох том гүүр нь байсан. 30 жилийн дараа тэдний нууц түүх олон нийтэд дэлгэгдэж байна. “Муфаса: Араатны хаан Арслан” уран сайхны кино нь 2019 онд Жон Фавро найруулагчийн “Араатны хаан Арслан” анимэйшний агуулгыг уран сайхнаар дүрсэлсэн адил нэртэй киноны өмнөх түүх юм.
Багадаа төөрч ганцаар үлдсэн бяцхан арслан “Муфаса” нь зэрлэг байгалиар тэнүүчлэн явж байхдаа хааны удам, ирээдүйн залгамжлагч Такатай тааралддаг. Тэр хоёр төрсөн ах дүү хоёр шиг дотно болж өсөн торниж, хувь тавилангаа эхлүүлэх аянд хамтдаа гардаг. Гэвч дайснуудын аюул занал дунд ах дүү хоёрын харилцаанд цав сууж эхлэн, төсөөлшгүй аюултай нүүр тулах болдог.
“Муфаса”-гийн найруулагчаар нь 2017 онд Academy Award for Best Picture шагналыг хүртсэн “Moonlight”-ийн Барри Женкинс ажиллажээ. Дуу оруулсан жүжигчид ч бас маш их хүлээлт үүсгэж байна. Жүжигчин Аарон Пьер Муфасагийн дууг оруулж, Такагийн дууг Кельвин Харрисон Жуниор оруулжээ. Мөн Муфасагийн эхнэр, хатан Сарабигийн дууг Тиффани Бун оруулжээ.
Мөн поп од Бейонсе, түүний охин Блю Айви тоглоно гэсэн яриа тарж, олны анхаарал ихээр татаж байсан. Бейонсе 2019 онд бүтээгдсэн “Араатны хаан Арслан” уран сайхны кинонд болон энэ кинонд ч бас Симбагийн унаган багын найз, хожим хатан болох Налагийн дүрийг, энэхүү бүтээлээр анх удаа кинонд тоглож буй Блю Айви нь Симба, Налагийн дундаас төрсөн Киара охины дүрийг бүтээжээ.
Муфаса 2024 оны 12-р сарын 20-ны өдөр нээлтээ хийнэ.
