Wicked киноны үргэлжлэл Wicked: For Good 11-р сарын 21-нд нээнэ

2025-09-15 01:57:42

Wicked кино бол өнгөрсөн оны 11-р сард нээлтээ хийснээс хойш Бродвэйн мюзиклээс сэдэвлэсэн киноны түүхэнд Mamma Mia! киноны араас бичигдэх амжилт олсноор зогсохгүй 97 дахь удаагийн Оскарын кино наадамд 10 төрөлд нэр дэвшиж зураглал, хувцасны төрөлд шагнал хүртэж, киноны дууны борлуулалтаар Billboard 200 жагсаалтын 2-т бичигдэн олныг шагшуулсан бүтээл билээ. 

Эхний ангид жинхэнэ хүчээ нээж илрүүлж чадаагүй Элфаба(Синтия Эриво), хэн гэдгээ таньж амжаагүй Глинда(Ариана Гранде) нар харилцан адилгүй хэрнээ дотносож сорилт шалгуур, адал явдалтай учирч байгаа тухай гардаг бол, энэ удаа 2-р анги болох Wicked: For Good -д шидтэн хатагтай Морриблд нийтийн дайсан гэж адлагдан хэцүүхэн байдалд орсон Элфаба, түүнд түшиг болсон Глинда нар томоохон бэрхшээлийн ард хэрхэн гарч байгааг харуулна.

Wicked: For Good киноны дэд гарчиг For Good нь эх мюзиклийн алдарт дуэт дууны нэр. Баруун зүгийн муу ёрын шулам гэгдэж зовж шаналсан Элфаба, түүний цорын ганц үнэнч найз Глинда нар яаж хувьсаж өөрчлөгдөх нь үзэгчдийн сонирхлыг татах нь дамжиггүй.

Нээлтийн мэдээтэй цуг цацагдсан зурагт хуудсанд өөд өөдөөсөө харж зогссон Элфаба, Глинда хоёр нэг л нууцлаг. Бараан хар үүлтэй баруун зүгт, индэрт зогссон Элфаба, эсрэг талд нь гоёмсог цэцэгс алагласан хадан хавцал дээрх Глинда, “Чи намайг өөрчилсөн” гэсэн өгүүлбэр нь саад бэрхшээлийг даван туулж өөрчлөлтийн төлөө тэмцэх энэ хоёр дүрийн араас замчилна. 

Эх мюзикл, кинонд дурлагсдын дуртай 2-р ангийн For Good дуунд гардаг дээрх өгүүлбэр харилцан даамай нөлөөлж өсөн дэвжиж байгаа хоёр дүрийн нөхөрлөлийн утга учрыг илүү гүн гүнзгий илэрхийлж байна.