Predator: Badlands … Харгис ертөнцийн үүд хаалга нээгдлээ

2025-10-27 03:02:15

Уртаас урт 38 жилийн турш үзэгчдийн хайр талархалд багтаж ирсэн Predator цувралын шинэ анги Predator: Badlands дэлгэцнээ гарах тун дөхлөө.

Predator: Badlands кинонд амьтай бүхний амийг залгидаг үхлийн нутагт хамгийн зартай ангууч Калискыг агнахаар ангууч Дек, хүн төрхтэй робот Тиа нар амь насаа дэнслэн хамтдаа тэмцэл өрнүүлж буйг өгүүлдэг. 2022 онд Disney+-аар гарсан Predator цувралын Prey ангийг олны хүртээл болгосон Дэн Трахтенберг зохиолыг нь бичиж, найруулсан нь үзэгчдийн анхаарлыг илт татаж байна.

Predator: Badlands киноны зохиомж анх удаа хүний өнцгөөс биш ангуучийн өнцгөөс илэрхийлж байгаагаараа онцлог ажээ. Найруулагч Дэн Трахтенберг “Аймшигт араатны дүрийг яагаад үзэгчид хөгжөөн дэмжиж болохгүй гэж?” гэсэн бодлоос энэ санаа урган гарсан гэж онцолсон байна.

Мөн “Ийм төрөл жанрт бараг байдаггүй эрхэм дүр бүтээхийг зорьсон. Энэ нь ч миний хувьд хамгийн том сорилт байлаа.” гэжээ. Иймд дэлгэцнээ нүдний өмнө тодрох орчлон ертөнцийн шилдэг дайчин ангуучдын овгийн сүр хүчийг хүсэн хүлээхгүй гээд яах билээ.

Трэйлерт киноны гол дүр “Би зүгээр нэг ан биш.” хэмээн чанга хашхирч, өөрийг нь ангуучлагч амьтадтай тулалдаж байгаа нь хүлээлтийг улам нэмэгдүүлнэ.  

Predator: Badlands киног ирэх 11-р сарын 7-нд нээхээр төлөвлөжээ.