“Аватар: Гал ба үнс” 3 цаг 15 минут. Цувралын түүхэнд хамгийн урт нь

2025-11-27 11:25:50

“Аватар: Гал ба үнс” (Аватар 3, найруулагч Жэймс Камерон) кино 3 цаг 15 минут(195 минут) үргэлжилнэ. Өөрөөр хэлбэл цуврал дотроо хамгийн урт нь. Өнгөрсөн жил 3 цаг 12 минут(192 минут) үргэлжилдгээрээ олны анхаарлыг татаж байсан “Аватар: Усны ертөнц” хэмээх өмнөх ангиасаа 3 минут урт болжээ. 2009 онд нээсэн эхний анги “Аватар 1” кино 2 цаг 42 минут(162 минут) үргэлжилдэг. 

“Аватар: Гал ба үнс” бол Аватар цувралын 3 дахь бүтээл. Энэ ангид гол дүр Жэйк Салли(Сэм Уортингтон), Нэйтири(Зои Салдана) нарын ууган хүү Нэтей амиа алдсаны дараа уй гашууд автан байх үед тэдний өмнө Варанг(Уна Чаплин)-аар толгойлуулсан үнсний омог гарч ирж гал үнсэнд бүрхэгдсэн Пандорад үйл явдал хэрхэн өрнөж байгааг харуулна.

Шинэ ангид амьдралын гашуун зовлонд нэрвэгдсэн Саллигийнхны түүх, цувралд анх гарч байгаа үнсний омог, мөн Пандорагийн нууцлаг талуудыг илүү тод томруун дүрслэх ажээ. Түүнчлэн урьд урьдынхаас давж гарсан тэмцэл тулаан киноны ертөнц, үзэл санааг улам шинэлэг, өнгөлөг болгоно.

Сэм Уортингтон, Зои Салдана, Сигурни Уивер, Стивен Ланг, Кэйт Уинслет нар эргэн ирэхээс гадна Уна Чаплин, Дэвид Тьюлис нар шинээр өвөрмөц дүр бүтээж үзэгчидтэй учран золгоно. 

Холливудын уран зөгнөлт “Аватар” кино анх 2009 онд дэвшилтэт технологи ашиглан шуугиан тарьж дэлхий дахинаа 2.9 тэрбум долларын орлого олсон юм. Энэ кино дэлхийн дээд амжилтаа 16 дахь жилдээ эзэмшиж байна. 2022 онд нээсэн 2 дахь анги “Аватар: Усны ертөнц” ковидын цар тахалтай зэрэгцсэн хэдий ч дэлхийд 2.3 тэрбумын орлого олж 3-р байранд орсон байдаг. 

“Аватар: Гал ба үнс” кино 12-р сарын 19-нд нээлтээ хийнэ.