Avengers: Doomsday кинонд Ахмад Америк нэгдэнэ
2025-12-29 11:02:49
Авенжерс цувралын шинэ анги Avengers: Doomsday кинонд Ахмад Америк(Крис Эванс) эргэн ирнэ.
Avengers: Doomsday ангид Ахмад Америк Стив Рожерсыг эргэн ирж байгааг илтгэх трэйлер, зурагт хуудас цацагджээ.
Зурагт хуудсанд Авенжерсыг бэлгэдсэн A үсгэн лого гарч байна. Шинэ ангийн үндсэн өнгө болох ногоон туяатай лого гэрэлтэж хүчтэй сэтгэгдэл төрүүлэхийн зэрэгцээ шинээр эхлэх Авенжерсын түүх сонирхол өдөөнө.
Трэйлерийн хувьд Марвелын кино ертөнцөд Ахмад Америкийн дүрээр олон жил үзэгчдийн хайр хүндлэл хүлээсэн Крис Эванс эргэн ирж байгааг харуулж, дэлхий даяарх шүтэн бишрэгчдийг нь хуйлруулж эхэллээ. Бичлэг дээр Avengers: Endgame-ээс хойш эгэл амьдралдаа орсон Стив Рожерс Ахмад Америкийн өмсгөлөө тайлж хүүгээ тэвэрсэн хэсэг багтсан нь анхаарал татна.
Бичлэгийн төгсгөлд “Стив Рожерс Avengers: Doomsday-д эргэн ирнэ” гэсэн бичиг гарч дахин Марвелын ертөнцөд нэгдэж байгааг баталлаа. Иймд Стив Рожерс чухам ямар учраас эргэн нэгдэх болсон тухай түүх сонирхол татах нь тодорхой боллоо.
Avengers: Doomsday ангийг өмнөх ангиудыг найруулсан ах дүү Руссо найруулсан агаад, Төмөр хүний дүрээр Марвелын түүхийг бичилцсэн домогт жүжигчин Роберт Дауни жүниор доктор Дум болж шуугиан тарьж байгаа билээ.
Avengers: Doomsday 2026 оны 12-р сарын 18-нд нээлтээ хийнэ.
