28 Years Later: The Bone Temple жихүүдэс төрүүлэм айдсыг мэдэр ...

2025-10-17 08:57:07

“28 жилийн дараа” киноны үргэлжлэл 28 Years Later: The Bone Temple ирэх жилийн 1-р сард нээлтээ хийхээр болжээ. 

Гурвал бүтээлийн эхнийх нь болох “28 жилийн дараа” кино нээлтээ хийсэн даруйд Хойд Америкийн бокс оффист тэргүүлээд зогсохгүй цуврал киноны түүхэн дээд амжилт тогтоож, үзэгчдийн дунд дуулиан тарьсан билээ. 

Хоёр дахь ангийн трэйлер хүүрнэгчийн “Ирээдүйг тааварлана гэдэг хий дэмий, осолтой зүйл.” гэсэн жихүүцэм үгээр эхэлж айдас хүйдсийн ертөнцөд урин дуудна. 

Үүний дараа “Үнэндээ ирээдүй гэж байхгүй ч байж болно.” хэмээн өгүүлж, хөдөө тосгоны тайван намуун уур амьсгал хормын төдийд эвдэрч түгшүүр нэмэгдэнэ. Мутант вирус, хувьсан өөрчлөгдсөн халдвар тээгчдээр дүүрсэн эх газрын гүнд хараахан ил болоогүй бараан ертөнцийг уудлан харуулах дүр зургууд 28 Years Later: The Bone Temple киноны шинэ түүхийг эрхгүй хүлээлгэнэ. 

Халдвар тээгчдийн довтолгооноос амьд үлдсэн хүү Спайк(Алфи Уильямс) төрөлх нутаг, вирусаас бүрэн тусгаарлагдсан Ариун арал руу буцалгүй, тамаас ялгаагүй эх нутагт үлдэхээр зориг шулуудаж, энэ цаг мөчөөс тааварлашгүй үйл явдлууд түүнийг бүчин авна.

Тэдний удирдагч, өмнөх ангийг цочирдом төгсгөсөн Жими(Жэк О’Коннел) галзуу эрч хүчээр уур амьсгалыг тэр дор нь эзэмдэж анхаарал татна. Халдварлагсдын дунд амьдарч буй Келсон доктор(Рэйф Файнс), Жимитэй үзэлцэж, тэдний хооронд Спайк гол зангилаа болж холбогдоно.  

Энэ бүхэн өмнөхөөс хавь илүү өгүүлэмж, шинэ өрнөлийг зөгнөж, үзэгчдэд дахин нэг удаа хурц цочирдол, гүн айдсыг мэдрүүлэх нь тодорхой. “28 жилийн дараа” 3 ангит цувралын удаах анги илүү өргөн үзэл санаа, үүх түүхийг хүлээлгэнэ. 28 Years Later: The Bone Temple кино “28 өдрийн дараа”, “28 жилийн дараа” кинонуудыг найруулсан өвөрмөц арга барилтай Дэнни Бойл продюссерын үүргээр оролцож, Алекс Гарланд зохиолыг дахин хариуцаж цувралын уялдаа холбоог хадгалжээ. 

Шинэ ангийг “Кэндимэн”, “Марвелс” бүтээлүүдээрээ танигдсан Ниа ДоКоста найруулж, өөр өнгө аяс, шинэлэг байдлыг бэлэглэнэ. Өмнөх ангид халдвартай ертөнцөд анх хөл тавьсан Спайк хүүгийн дүрээр хэн болохоо харуулсан жүжигчин Алфи Уильямс энэ удаад дүрээ илүү чадварлаг урлаж үзэгчдийг баярлуулах нь дамжиггүй. 

Тод томруун жүжиглэлтээрээ сэтгэл баясгасан, Келсон докторын дүрийг бүтээсэн Рэйд Файнс ч гэсэн эргэн ирж, шинэ орчинд гайхам адал явдалтай учруулан золгуулна. 

28 Years Later: The Bone Temple 2026 оны 1-р сард нээлтээ хийнэ.