Wicked: For Good, шинэ трэйлер… Дэлхий дахинаа 11-р сарын 19-өөс эхний нээлтээ хийнэ

2025-10-03 01:20:39

Wicked: For Good урт аяныхаа төгсгөлийг хийхэд бэлэн болжээ.

Universal Pictures студи 9-р сарын 25-нд Wicked: For Good(Найруулагч Жон М. Чу) киноны шинэ трэйлерийг цацлаа. Трэйлерийн агуулгад өөр өөр зам сонгосон Элфаба(Синти Эриво), Глинда(Ариана Гранде) нар зонхилох хувийг эзэлжээ. 

Тус ангид хүмүүсийн харцнаас айхаа больсон хорон шулам Элфаба, хүмүүст хайрлуулахаа больчих вий гэж айдаг, сайхан сэтгэлт Глинда нар заяа төөргөөрөө уулзан дотносож найзалж байгаа тухай өгүүлнэ. 

Хорон шулам гэгдсэн Элфаба хүмүүст адлагдан орь ганцаараа тэмцэж, өмнө нь тулгарах зовлон бэрхшээл, аюул заналаас огтхон ч айж сүрдэхээ больжээ.

Дохиурыг гартаа оруулж сайхан сэтгэлт шулам болж дахин төрсөн Глинда түмний хайранд умбаж байгаа боловч энэ бүхнээ алдах вий гэхээс үнхэлцгээ хагартал айна. Хувь заяаны эргүүлэг тэднийг алхам алхмаар ойртуулж, өсөлт хөгжил, өөрчлөлт хувьслыг нь алдахгүй үзэх юмсан гэх сэтгэгдлийг үзэгчдэд төрүүлнэ. 

Энэ зуур алга болсон Элфаба, дэргэдээс нь үл холдох Глинда нарын хооронд шаналах Озын хамгаалагчдын ахлах Фиеро(Жонатан Бэйли) ба Элфаба хоёрын тухай хар хэл амыг зогсолтгүй тараах хатагтай Моррибл(Мишель Ё)-ын дүр гарч ирж байгаа нь үйл явдлыг улам хурцатгах төлөвтэй.

Бас “Бүхнийг чадна. Хамтдаа” гэж Глинда хэлж байгаагаас үзвэл “Хүсэн хүлээсэн их аяны төгсгөлд бид үүрд өөрчлөгдөнө” гэсэн зурагт хуудасны үг ёсоор энэ хоёрын хамтын аян хэрхэн өрнөхийг харах үлдлээ. 

Ноднин 11-р сард нээсэн Wicked кинонд өөрийнхөө жинхэнэ хүч чадлыг таньж мэдээгүй Элфаба, мөн чанараа анзаараагүй Глинда нарын дотносолд учрах саад бэрхшээл, адал явдлыг өгүүлсэн байдаг. 

Өмнөх анги олон улсаас давхардсан тоогоор 756 сая 420 мянган долларын орлого олж, 97 дахь удаагийн Оскарын кино наадмын 10 төрөлд нэр дэвшиж зураглал, хувцасны дизайны шагналыг хүртсэн билээ. Түүнчлэн киноны дууны борлуулалтаар The Billboard 200 жагсаалтын дэд байр эзэлж гайхамшигтай амжилт олсон удаатай.

Өмнөх ангиас 1 жилийн дараа удаах анги буюу Wicked: For Good киног 11-р сарын 21-ээс үзэх боломжтой боллоо.