“Муфаса”, өнчин нэгнээс домгийн хаан болох хүртэл...
2025-01-14 09:35:46
Ганцаардмал өнчин нэгнээс домогт хаан болсон Муфасагийн түүх ил боллоо. Өөрийн хувь тавиланг эхлүүлж, ганцаараа биш, хамтдаа байхын үнэ цэнийг ойлгуулан түгээх, жинхэнэ удирдагчийн мөн чанартай “Араатны хаан Арслан: Муфаса”.
2024 оны 12-р сарын 20-ны өдөр нээлтээ хийсэн “Араатны хаан Арслан: Муфаса” (Барри Женкинс) нь асар уудам зэрлэг байгальд өнчин хоцорсон бяцхан арслан Муфаса нь хааны удам, ирээдүйн хаан суудлыг залгамжлагч Такатай уулзсанаас хойш, зурагдсан хувь тавиланг өөрчлөн дэлхийн хаан болсон домогт аяныг дүрсэлсэн кино юм. “Moonlight”-аар 89 дэх удаагийн Academy Award for Best Picture шагналыг хүртсэн Барри Женкинс найруулагчаар нь ажиллаж, “Араатны хаан Арслан” (2019)-гийн зохиолыг бичсэн Жефф Натансон” зохиолыг нь бичжээ.
Тус кино Симба, Нала хоёрын охин Киарад түүний өвөө Муфасагийн түүхийг Рафики ярьж өгч байгаагаар эхэлдэг. Эцэг эхийн хайрыг хүртэж, аз жаргалтай амьдарч байсан бяцхан арслан Муфаса нь үерийн улмаас төөрч, өргөн уудам зэрлэг байгальд тэнүүчилж явахдаа санаандгүй Такатай тааралддаг.
Үхэх аюулд унасан Муфасаг аварсан Така нь өөрийн нутаг руу түүнийг дагуулж ирдэг. Такагийн аав нь тэнүүлчийг хүлээн авч чадахгүй гээд Муфасаг эмэгчин арслангуудтай амьдруулж, Такад байнга Муфасагаас хол байхыг анхааруулдаг боловч, тэр хоёр бяцхан арслангууд ах дүү шиг дотно болж өсөн торнидог.
Гэтэл нэгэн өдөр хүчирхэг арслангийн сүрэг тэд рүү дайрч, Муфаса нь хааны удмыг залгах Такатай хамт хувь тавилангаа шинээр эхлүүлэхээр Милеле руу хамтдаа явдаг. Тийнхүү тэр хоёр эмэгчин арслан Сараби, эвэрт шувуу Зазу, сармагчин Рафикитай тааралддаг. Гэвч тэд нартай хамтдаа шинэ газрыг хайн явах Муфаса олон Такагийн бат бэх харилцаанд ан цав үүсч эхэлж, төсөөлшгүй аюултай нүүр тулах болдог.
Тус бүтээл нь “Араатны хаан арслан” анимэйшн бүтсэний 30 жилийн ойг угтан бүтээгдсэн “Араатны хаан арслан” (2019)-гийн өмнөх түүх бөгөөд гол дүр Симбагийн аав бөгөөд агуу хаан хэмээн дуудагдах Муфасагийн өнгөрсөн амьдралын тухай өгүүлдэг. Тэрээр хэрхэн өсөж торнихын зэрэгцээ Такатай юуны улмаас харилцаа нь муудсан тухай өгүүлдэг.
Муфасагийн эртний найз бөгөөд Симбад амьдралын ухааныг зааж өгсөн Рафики нь эртний домгийг амархан ойлгохоор ярьж өгч, Муфасагийн агуу түүхийг сонирхолтой болгох ажээ.
Цаст уул, хүрхрээ, өргөн уудам хээр тал зэрэг байгалийн үзэмж нь үнэхээр гайхшруулмаар. Энэхүү байгальд дураараа давхилдах өхөөрдөм бяцхан арслангаас араатан болсон арслан гээд амьтдын харагдах байдал, хөдөлгөөнийг яг л баримтат кино шиг бодитоор харуулжээ.
Муфаса яг одоо кино театруудад гарч байгаа бөгөөд кино 118 минут үргэлжлэх ажээ.
