Avengers: Doomsday кинонд тоглох жүжигчид тодорлоо

2025-03-31 02:34:07

Марвел студи 3 сарын 27-ны өдөр албан ёсны Юүтүб хаягаараа Avengers: Doomsday киноны жүжигчдийн багийг олонд дэлгэлээ. Тус бичлэг “Avengers: Doomsday киноны зураг авалт үргэлжилж байна” гэж дуусаж байгаа бөгөөд, Марвелын ээлжит цуврал, шинэ киноны багийг танилцуулжээ. Avengers: Doomsday нь Авенжерс цувралын 5 дахь кино. Зураг авалт эхлээд удаагүй, ирэх жилийн 5 сард нээлтээ хийх төлөвлөгөөтэй ажээ.

Марвел студиэс гаргасан тизер бичлэгт Крис Хемсворт, Ванесса Кирби, Энтони Маки, Себастян Стэн, Летитиа Райт, Пол Радд, Флоренс Пью, Том Хиддлстон, Педро Паскал нарын 27 жүжигчний нэр багтсан нь шүтэн бишрэгчдийн хүлээлтийг үүсгэлээ. 

Энэ удаагийн бүтээлд Тор, Ахмад Америк, Хүн-Шоргоолж зэрэг Марвелын кино ертөнц MCU-ийн гол супер баатруудтай хамт Гайхамшигт 4, Тандерболт гээд Марвелын олон дүрүүд гарах нь ээ. Мөн Икс-Хүмүүс киноны дүрүүд цөөнгүй гарч байгаа MCU-ийн анхны кино болж байна. Икс-Хүмүүсээс Патрик Стюарт, Иэн МакКеллен, Келси Грэммер, Жэймс Мэрсден, Элан Камминг, Ченнинг Тейтум, Ребекка Ромейн нар тоглоно. 

Ассошиэтед Пресс агентлаг “Хожим өөр жүжигчид нэмэгдэж магадгүй.” гэж мэдээлжээ.

Марвел студи бага Роберт Дауниг Авенжерс: Эцсийн тулаан(2019)-аас хойш олон жилийн дараа MCU-д эргэн нэгдлээ гэдгийг онцлов. MCU-ийн шинэ эринг эхлүүлж болзошгүй энэ удаагийн кинонд бага Роберт Дауни эсрэг дүр Доктор Дүмд тоглоно. Тэрээр Төмөр хүний дүрээр MCU-д чухал байр эзэлдэг.

Найруулагчаар Ахмад Америк: Өвлийн цэрэг(2014), Авенжерс: Цаглашгүй дайн(2018) кинонуудыг найруулсан Энтони Руссо, Жое Руссо нар ажиллаж байна. Ах дүү Руссо 2027 онд нээлтээ хийх тус цувралын 6 дахь нь болох Avengers: Secret Wars киног бас найруулах ажээ. 

Зургийн эх сурвалж: Disney