Шинэ, тагнуултай, триллер кино The Amateur

2025-04-07 02:35:41

The Amateur кинонд Тагнуулын төв газрын код тайлагч Чарли Хеллер(Рами Малек) эхнэрийнхээ өшөөг авах гэж Европ даяар аалзны тор шиг хэрэн сүлжсэн алан хядагчдыг мөшгөж байгаа үйл явдлыг өгүүлсэн учраас Лондонгоос авхуулаад Парис, Марсель, Мадрид, Истанбул хотуудаар тэднийг мөшгөн явж буй Чарли Хеллерийг нэг бүрчлэн дагаж илүү амьд харуулахыг зорьжээ. Эхнэрийнх нь алагдсан Лондон хот төдийгүй Парис, Мадридаар очиж байгаа түүний хилэнт өшөө авалт өргөн цар хүрээг хамарч, үзэгчдийг суудлаас нь өндөлзүүлэх болно. 

Найруулагч Жэймс Хоус ба киноны багийнхан энэ хотуудыг зүгээр нэг үйл явдал өрнөж буй газар гэж дүрслээд зогсохгүй киноны салшгүй нэг хэсэг болгон харагдуулж, ямар газрыг сонгохоо ч нарийн төлөвлөжээ.

Продюсер Дэн Вилсон нэгэн ярилцлагадаа “Бид аль болох бодитой мэдрэгдэхүйц, содон, хамгийн тохиромжтой гэсэн газруудыг сонгосон. Хүн бүхний мэддэг Эйфелийн цамхагийг жишээ нь сонгосон бол нэг их гоц гойд мэдрэмж төрүүлэхгүй.” “Онцгой шинэлэг уур амьсгалыг бүрдүүлэх ёстой учраас киноны утга агуулгатай таарч тохирохын сацуу хүмүүс төдийлөн зорин очдоггүй газруудыг сонгох гэж нэлээд чармайсан.” гэж хэлжээ. Ялангуяа Марсель хотын эгэл жирийн хэрнээ өнгө үзэмжтэй байдал киноны үйл явдлыг тод томруун харуулахад нэмэр болсон байна.

Бас гол дүр Чарли Хеллер Истанбул хотын содон гудмаар туучиж байгаа нь цаанаа л шинэлэг, сонирхолтой мэдрэмж төрүүлж, сэтгэл түгшим байдлыг улам хурцатгах мэт. Ийнхүү янз бүрийн газар орныг ашиглаж сэтгэл хөдлөл, тэр дундаа түгшүүрийг гүнзгий мэдрүүлэх The Amateur кино дэлгэц дүүргэж, үзэгчдийг уулга алдуулахад бэлэн болжээ.

The Amateur кино 4-р сарын 11-ээс кино театруудын дэлгэцнээ гарна.