Жэймс Ганны найруулсан “Супермэн” киноны 2 дахь трэйлер гарлаа
2025-05-25 11:17:29
5-р сарын 15-нд нийтэд дэлгэсэн 2 дахь трэйлер шинээр мэндэлсэн “Супермэн”-ий чухам хэн болохыг таниулж, бас супер баатартай блокбастерын нэрийг үл унагах хэмжээнд сүр далайцтай болгож чадсан нь үзэгчдийн анхаарлыг шууд татахаар ажээ.
Трэйлер “Супермэн”(Дэвид Коренсвет)-ийг танилцуулах мэт Лойс Лэйн(Рэйчел Броснахан)-д ярилцлага өгч байгаагаар эхэлнэ. Тун удалгүй Супермэний үйлдлийн зөв бурууг шүүсэн хурц асуултуудыг асуухад Супермэн “Би зөвхөн өөрийгөө төлөөлнө. Сайн сайхны төлөө энэ бүхнийг хийсэн.” гэж эрс шийдмэг хариулж байгаа нь “Аливаа үйлдлийг хийхээсээ өмнө үр дүнг нь тунгаах байсан шүү дээ.” гэсэн Лойсын тулгасан асуултыг эрс няцааж хурцадмал байдал үүсгэж байна.
Дараа нь “Сонголт чинь, үйлдэл чинь чамайг хэн гэдгийг харуулна.” гэсэн утга төгөлдөр үг дэлхийн хүмүүс Супермэнийг юу гэж үздэг, тэр бүхний дүнд Супермэн баатар хүний хувьд ямар хариуцлага үүрэх ёстой болдогийг илтгэж, үйл явдал хэрхэн өрнөх бол гэсэн хорхойслыг төрүүлнэ.
Эсрэг дүр Лекс Лютор(Николас Холт)-ын зан хандлага ч түгшүүртэй байдлыг хурцатгана. Түүний “Супермэн бол хүн биш.” гэсэн ширүүн үг, Супермэнийг цоо ширтэх харц Супермэнийг хэрхэвч зүгээр өнгөрөөхгүй гэдгийг харуулж, тэд хоорондоо хэрхэн ач тач тэмцэлдэхийг урьдчилан хэлэх мэт. Үүний зэрэгцээ трэйлерт үе үе харагдах учир үл мэдэгдэх дайснууд, аварга биетэн нь тус студийн блокбастераас л үзэж болох цар хүрээ, гал бутарсан тэмцэл тулааныг сануулна. Ялангуяа ямар ч аюул заналхийлэлд өвдөг сөхрөлгүй сөрдөг, нисэн дүүлэгч Супермэний дүр үзэгчдэд гүн сэтгэгдэл үлдээх нь лавтай. Бас супер нохой Крипто ч олны талархлыг хүлээх нь дамжиггүй.
Супермэн кино бол “Suicide Squad”, “Галактикийн хамгаалагчид” цувралуудаар өөрийн гэсэн өнгө төрхөө харуулж, үзэгчдийн сэтгэлийг татсан найруулагч Жэймс Ганн DC студийн шинэ тэргүүний ажлыг хүлээж аваад зохиолыг бичиж, найруулсан бүтээл нь юм. Супермэний дүр Нэтфликсийн House of Cards, The Politician кинонд амжилттай тоглосон Дэвид Коренсветэд ногджээ. Харин Супермэний заналт дайсан Лекс Люторын дүрд X-Men цувралаас эхлээд Mad Max: Fury Road, Those Who Wish Me Dead гэх мэт олон бүтээлд чадварлаг жүжиглэсэн Николас Холт тогложээ.
Супермэн киног 7-р сарын 11-нд нээхээр төлөвлөсөн байна.
