“28 жилийн дараа” айдас хургаж, санаа арвижжээ

2025-06-12 07:21:34

20 хоногийн дараа нээлтээ хийх “28 жилийн дараа” киног найруулсан Дэнни Бойл, зохиолыг бичсэн Алекс Гарланд нар киноны үйл явдлыг хэрхэн харуулах тухай, бас халдвар авсан хүмүүсийн онцлог зэрэг сонирхолтой зүйлсийг ярьжээ.

Зомбитой киноны түүхийг шинээр бичсэн домогт “28 жилийн дараа” киноны дараагийн анги 18 жилийн дараа “28 жилийн дараа” нэрээр эргэн ирлээ. “28 жилийн дараа” киноны Дэнни Бойл найруулагч “Киног бүтээхдээ дэлхийн сүйрлээс хойших шинэ ертөнцийг төсөөлж үзсэн. Догшин вирус тархаж эхэлснээс хойших ертөнцийг ерөнхийд нь дүрсэлсэн” гэв.  

“28 жилийн дараа” киноны үйл явдал өрнөдөг “Ариун арал”, “эх нутаг”-ийн тухай яриа ч анхаарал татна. Амьд үлдэгсдийн орогнож буй, бүрэн тусгаарлагдмал “Ариун арал”-ын тухай “Хамгаалалтын системтэй далангийн замаар хүрээлэгдсэн боловч машин техник байтугай тог, түлш ч байхгүй газар. Амьдралын бүхий л зүйл хормын төдийд утга учиргүй болно” гэж Дэнни Бойл мэдэгдэв. Өнгөрсөн үед эргээд очсон юм шиг дүрслэгдэх ажээ. Вирусын халдлагад өртсөн “эх нутаг”-ийн тухайд “Арал дээрх хүмүүст найдлага, заналхийллийн аль алийг дагуулж ирнэ” гэж хэлсэн нь бүрэн эсрэгцэх энэ хоёр орон зайд үйл явдал хэрхэн өрнөх бол гэсэн асуултыг төрүүлнэ. 

Кино зохиолыг бичсэн Алекс Гарланд “Ямар ч шалтгааны улмаас аль нэг улс сүйрвэл ерөнхийдөө хаягдаж орхигддог. Энэ зуур харгис, хахир, хүчтэй нь хүчгүйгээ барьж идэх зарчим үйлчилдэг” гэсэн нь халдвар авсан хүмүүс, амьд үлдсэн хүмүүсийн тэмцлээс гадна том системийн хүрээнд хүний мөн чанар хэрхэх вэ гэсэн сэдвийг гаргаж ирж байгаагаараа тус бүтээлийн онцлог болжээ.

Эцэст нь найруулагч Дэнни Бойл “Киноны уг чанар гэж бий. Тийм болохоор тултал нь зүтгүүлэх ёстой гэсэн хариуцлага мэдрэгдсэн. Бачуурч байж ядам тийм л хүчтэй мэдрэмж төрүүлмээр байна. Өмнөхөөсөө тэс ондоо шинэ кино болгохыг хичээсэн” гэж сэтгэлээ уудалсан нь ил биш далд торгон утас, аазгайг хөдөлгөх чанарт маш их анхаарснаа цухалзуулж, үзэх ёстой кино юм байна гэсэн сэтгэгдлийг хүмүүст хүргэж чадлаа.

“28 жилийн дараа” кинонд 28 жилийн өмнө халдварлаж эхэлсэн вирус дэлхийн хүмүүсийг нөмрөн авсны дараа амьд үлдсэн зарим хүмүүс бүрэн тусгаарлагдан амьдарч буй “Ариун арал” дээр төрсөн Спайк хүү амьдралдаа анх удаа арлаас явж вируст автсан эх нутагт хөл тавьснаар, халдвар аваад хувьсаж өөрчлөгдсөн хүмүүстэй нүүр тулж байгаа түүхийг өгүүлж нуруу хүйт оргим айдсыг мэдрүүлнэ. 

Жоди Комер, Аарон Жонсон, Ральф Файнс, Жэк О’Коннелл, элфи Улиьямс нарын тоглосон “28 жилийн дараа” кино 6-р сарын 20-ны өдөр нээлтээ хийнэ.