Ганцаардмал хүүгийн сансарт туулсан адал явдал... Диснейн шинэ бүтээл “Элиогийн сансрын аялал” кинонд өгүүлэх сэтгэл хөдөлгөм түүх

2025-06-16 02:10:03

Дисней, Пиксарын шинэ бүтээл “Элиогийн сансрын аялал” киноны хоёр найруулагчийн өгсөн мэдээлэлтэй танилцъя.

“Элиогийн сансрын аялал” кинонд бөмбөрцөг дэлхийд ганцаардсан Элио нэг өдөр гэнэт сансарт дуудагдаж онцгой найзтай болж байгаа тухай өгүүлдэг. 

Inside out -ын гуниг, Inside out 2 -ын түгшүүрийн араас ганцаардлыг анхааралдаа авсан “Элиогийн сансрын аялал” киноны гол дүр нь эцэг эхээ алдсанаас хойш авга эгчтэйгээ амьдрах болсон 11-тэй хүү Элио. Газар дээр өөрийг нь гэх ганц ч найзгүй Элио түүнийг асарч халамжилж буй авга эгчдээ дарамт болох вий гэж эмээн халуун дотно харилцааг үүсгэж чадалгүй, яах учраа олж ядна. 

Гэр бүл ч үгүй, найз нөхөд ч үгүй хаана хэнд итгэж найдахаа мэдэхгүй яваа Элио дэлхийд харийн нэгэн шиг бэдэрч яваад, байх ёстой газар нь сансар огторгуй юм байна гэж итгэж харийнханд хулгайлагдах өдрөө хоног тоолон хүлээдэг.  

Найруулагч Маделин Шарафиан өгүүлэхдээ “Кино эхлэхэд хүү дэлхийг сүүдрээр төсөөлж, газар дэлхийд жаргалтай амьдрах боломжгүй гэж үздэг. Бид энэ киног үзсэн хүмүүс үзвэрийн танхимд орж ирсэн шигээ биш ондоо сэтгэгдэлтэй болоод танхимаас гараасай гэж хүсэж байна. Хүсэл найдвар, хэлхээ холбоог бид мэдрүүлэхийг зорьж байгаа. Киног үзсэний дараа дэлхий ертөнцийг арай өөрөөр хүлээн авч, бусдыг хүлээлгүй өөрөө түрүүлж гар сунгавал их сайн байна.” гэсэн нь киноноос авах сэтгэл догдлолыг тэсэн ядан хүлээлгэнэ. 

Хүссэнээрээ сансарт очсон Элио сэтгэлийг нь ойлгох Глодентой нандин нөхөрлөл үүсгэдэг. Тус тусдаа ганцаардлыг утгаар нь мэдэрч үзсэн учраас нэг нэгнээ маш хурдан ойлгож, аргадаж чаддаг. Ганцаардал хэмээх адил тал нь тэр хоёрыг найзлуулж нөхөрлүүлнэ. Хэн ч ганцаарддаг, гэхдээ ганцаардлыг зөвхөн хар бараанаар тусгаж авах хэрэггүй гэдгийг кино бидэнд ойлгуулна. Бас байх ёстой газраа олоход тусалж, хажуу дэргэд байгаа нэгэн маань хэчнээн эрхэм бэ гэдгийг ч эргэн сануулна.

Доми Ши найруулагч “Элио бол бүх насныханд зориулсан кино. Ганцаардаж уйтгарлаж үзсэн, тулж түших хэн нэгнийг эрж хайж байгаа хүмүүст өчүүхэн ч болов гэрэл гэгээ бэлэглэнэ гэж найдаж байна.” гэжээ. 

“Элиогийн сансрын аялал” 6-р сарын 20-ны өдөр нээлтээ хийнэ.