"Юрийн галавын ертөнц" дэх Скарлетт Йоханссон – аюул эрсдэл дүүрэн зураг авалт…
2025-07-02 11:40:40
"Юрийн галавын ертөнц: Шинэ эхлэл" кино нь хүн төрөлхтнийг аврахаар Юрийн галавын цэцэрлэгийн нууц судалгааны лаборатори байрлаж байсан дэлхийн хамгийн аюултай арал дээр очсон Зора (Скарлетт Йоханссон), доктор Хенри (Жонатан Бэйли) нар нууцлаг, цочирдом үнэнийг олж мэдэхийн зэрэгцээ үлэг гүрвэлүүдэд бариулалгүй эсэн мэнд үлдэхийн төлөө хэрхэн тэмцэж буйг харуулна.
Кинонд оролцсон жүжигчид, уран бүтээлчид өмнөх Юрийн галавын цувралаас ялгарах онцгой дүр зургийг гаргахын тулд Тайланд, Их Британи, Нью-Йорк, Мальта зэрэг дэлхийн олон оронд зураг авалт хийжээ. Ялангуяа байгальд авсан зураг авалтын үеэр тохиолдсон эрсдэлтэй алхмуудыг дэлгэсэн нь олны анхаарлыг татаж байна.
Найруулагчаар ажилласан Гарет Эдвардс Юрийн галавын цувралыг заавал байгалийн орчинд зургийг нь авах ёстой гэж үздэгээ онцолж байв.
Энэ итгэл үнэмшлийнхээ дагуу уг бүтээлийн ихэнх зураг авалтыг халуун орны ширэнгэн ой, далай, Мангровын намаг зэрэг байгалийн эрс тэс нөхцөлд авчээ.
Тэрээр “Гол, Мангровын намагт зураг авч байхдаа хортой аварга могой, хорт аалзтай тааралдсан. Үнэхээр амь насанд аюул учирч болохуйц байсан” талаар дурссан байна. Гэсэн хэдий ч тэрээр киногоо үзэгчдэд аль болох бодитой мэдрэгдээсэй гэж хүсэж байсан учраас жүжигчдээ ятгаж, зөвхөн Юрийн галавын цувралаас л үзэж мэдрэх боломжтой бахдам дүрслэлийг бүтээж чаджээ.
Скарлетт Йоханссон ч уг киноны дүр дүрслэлд бүрэн итгэлтэй байгаагаа илэрхийлэхдээ, “Үзэгчид өөрсдийгөө анхны цувралыг үзэж байсан шигээ Юрийн галавын аралд хашигдаж хоригдсон мэт мэдрэх болно. Илүү бодитой, тэгсэн хэрнээ ид шидийн мэт зураглал бүтээх нь бид бүгдийн зорилго байсан. Байгалийн дүр зураг үнэхээр гайхамшигтай байсан бөгөөд киноны үйл явдалд таныг өөрийн эрхгүй татан оруулна” гэжээ.
Avengers цувралын Блэк Видоугийн дүрд чадварлаг жүжиглэж, хүчирхэг харизмаараа үзэгчдийн хайрыг булаасан Скарлетт Йоханссоноос гадна Green Book киноны дүрээр 91 дэх удаагийн Оскарын шагнал хүртсэн жүжигчин Махершала Али, Wicked мюзиклийн Фиерогийн дүрээр олны танил болсон Холливудын од Жонатан Бэйли нарын шилдэг жүжигчид шинэ бүрэлдэхүүнд нэгдэн гар сэтгэл нийлэхийн давуу талыг үзүүлэх ажээ.
Мөн Godzilla, Rogue One: A Star Wars Story, The Creator бүтээлүүдээрээ дэлгэц дүүрэн гайхалтай дүр зургийг бүтээж авьяас чадвараараа гайхагдсан найруулагч Гарет Эдвардс энэ ангийг найруулж, 1993 оны анхны анги буюу “Юрийн галавын цэцэрлэг” киноны зохиолыг бичсэн Дэвид Кепп 30 жилийн дараа тус ангид дахин оролцжээ.
"Юрийн галавын ертөнц: Шинэ эхлэл" киног 7-р сарын 4-өөс кинотеатруудын дэлгэцээр үзээрэй.
