“Кунфу панда”-ийн дараа гарч байгаа Дриймворксын шинэ бүтээл “Муу залуус 2”

2025-07-21 01:36:06

“Шрек”-ээс эхлээд “Мадагаскар”, “Кунфу панда”, “Босс жаал”, “Лууг хэрхэн сургах вэ” гэх мэтчилэн ар араасаа цуварсан, баялаг уран сэтгэмжтэй бүтээлүүд, өөр өөрийн өнгө төрх бүхий дүрүүдтэй алдарт Дриймворкс энэ удаа “Муу залуус 2” хүүхэлдэйн киногоор үзэгчдийн сэтгэлийг сэргээж, нүдийг баясгах болно. 

“Муу залуус 2” бол сайн зам мөрөөр замнаж сайхан амьдрах гэж хичээж буй муу залуус, шинээр гарч ирсэн “Муу охид”-ын нөлөөгөөр амьдралдаа ганцхан удаа тохиох дэлхийн хэмжээний гэмт хэргийн төлөвлөгөөнд татагдан орж байгааг өгүүлэх тулаант блокбастер кино. 

“Муу залуус 2”-ын үндсэн зурагт хуудаснаа “2” гэсэн том тооны хоёр талд зогссон “Муу залуус”, “Муу охид” анхаарал татна.

Төлөвлөгөөг санаачлагч, багийн манлайлагч “Вулф”, багийнхныхаа гол түлхүүрийн үүрэг гүйцэтгэгч “Снэйк”, толгой сайтай хакер “Тарантула”, цочмог тулаанч “Пираня”, аливаад адтай “Шарк”. Нэг нэгнээ нөхсөн, нэмэр тус болсон дэлхийд шилдэг муу залуус дуулиантайгаар эргэн ирлээ. 

“Муу охид”-ын толгойлогч, ухаалаг нь дэндсэн “Китти Кэт”, суут инженер “Пигтэйл”, овжин луйварчин “Дум”. Шинээр гарч ирсэн, сэтгэл татам “Муу охид” ямар хэрэг тарихыг хэн ч үл мэднэ. Нүд алдам уудам цөлийг туулахдаа “Муу залуус” хэрхэн хөгөө тарьж, элэг хөшөөх нь хэн бүхэнд сонирхолтой.

Киноны трэйлер “Олон зүйл өөрчлөгдсөн. Итгэхгүй л байх. Гэхдээ муу залуус сайн залуус болсон” гэж Вулф хэлж байгаагаар эхэлнэ. Гэмшиж ухаарсан муу залуусын шинэ амьдрал ямар байх бол? Дуулиант түүх нь тэдний шинэ амьдралд саад учруулж, “Муу залуус”-т итгэхээ байсан олны дунд зөв сайхан амьдралд хөл тавиад хэр удахыг хэлэхэд бэрх. 

Ядаж байхад яр гэгчээр “Түүхэнд нэрээ үлдээх зартай хулгайд хамтаръя” хэмээн гарч ирсэн шинэ баг “Муу охид” тэднийг урхидаж томоохон гэмт хэргийн төлөвлөгөөнд уруу татна. Шинэ ажилтай болсон таван муу залуугийн зогсолтгүй хэрүүл тэмцэл, хөгжилтэй уур амьсгал зуныг хэрхэн зугаатай болгохыг хүлээх л үлдлээ. 

Энэхүү блокбастерын бас нэг давуу тал нь гэвэл “Вулф”-ийн дүр “Төмөр хүн 2”, “Аргайл”-ын Сэм Рокуэлл, “Тарантула”-ийн дүр “Шан-Чи Арван бөгжний домог”, “Кунфу панда 4”-ийн Аквафинагийн чадамгай дуу оруулалтаар амилах ажээ. 

Муу залуус 2 хүүхэлдэйн кино 8-р сарын 1-ээс кинотеатруудын дэлгэцнээ гарна.