“Чөтгөрийн ангууч” анимэйшн амжилтуудыг шинэчилсээр байна

2025-08-08 02:35:23

Гайхалтай хурдаар Японы бокс оффисын түүхийг дахин шинээр бичиж байгаа “Чөтгөрийн ангууч: Хязгааргүй цайз” анимэйшн 9-р сарын 12-нд Монголд нээлтээ хийнэ.

Готогэ Коёохарүгийн 220 сая хувь борлуулагдсан манга номоос сэдэвлэсэн телевизийн цуврал, кинотеатрын бүрэн хэмжээний анимэйшн дэлхийн хэмжээнд олон үзэгчдийн хайр талархлыг хүлээж байна.

Гол дүр Камадо Танжиро гэрийнхнээ чөтгөрүүдэд алдсан бөгөөд, чөтгөр болсон дүү Нэзүкогоо буцааж хүн болгохын тулд ангуучдын салаанд элсэн тэмцэж байгаа тухай өгүүлдэг энэхүү зохиол нарийн зураглал, эрч хүч дүүрэн тэмцэл тулаанаараа аль хэдийн шүтэн бишрэгчдийн хүрээлэлтэй болсон билээ. 

Энэ удаа кинотеатрын бүрэн хэмжээний анимэйшнд Чөтгөрийн ангууч зохиолын төгсгөлийн хэсгийг харуулжээ. Чөтгөрүүдийн үүр уурхай “Хязгааргүй цайз”-д өрнөх чөтгөрүүд ба ангуучдын шийдвэрлэх эцсийн тулааныг дүрсэлсэн 3 ангит цувралын эхнийх болох энэ ангид гол дүр Камадо Танжиро хорон санаат Кибицүжи Мүзантай тулалдахаас өмнө Дома, Аказа, Кайгакү нарын хүчит чөтгөрүүдтэй хэрхэн тулалдаж байгааг харуулжээ. 

“Чөтгөрийн ангууч” анимэйшний шинэ анги Японд 7-р сарын 18-нд нээлтээ хийснээс хойш амжилтын буухиагаа үргэлжлүүлсээр байна. Нээлтээ хийсэн эхний 8 өдөрт 1 сая иений орлого олж Японд кинотеатрт гарсан кинонуудаас хамгийн богино хугацаанд ийм орлого олсон кино болсноос гадна эхний 10 өдөр тус киног 9 сая хүн үзжээ. 2020 онд мөн адил орлогоороо тэргүүлсэн “Чөтгөрийн ангууч: Мөнхийн галт тэрэг”(40.4 тэрбум иен) анимэйшний амжилтыг эвдэх эсэхийг цаашид хүлээх л үлдлээ.