Chainsaw Man кинотеатрын дэлгэцнээ 9-р сараас гарна
2025-08-27 10:44:21
Олон улсад 30 сая гаруй хувь борлуулагдсан Chainsaw Man комикийн анхны албан ёсны бүрэн хэмжээний кино болох Chainsaw Man – The Movie: Reze Arc ирэх 9-р сарын 26-ны өдөр нээлтээ хийнэ.
Тулаант, уран зөгнөлт тус бүтээлд цахилгаан хөрөөтэй чөтгөр Почитатай гэрээ байгуулж Chainsaw Man буюу цахилгаан хөрөөт хүн болсон Дэнжи хүү, хаанаас гаралтай хэн гэдэг нь тодорхойгүй Рэзэ охин хоёрын сүр дуулиант уулзалтын тухай өгүүлдэг.
Үндсэн зурагт хуудсанд цахилгаан хөрөөт чөтгөр болж хувирсан Дэнжиг тод томруун харуулжээ.
Хүчтэй дэлбэрэлтийг дэвсгэр болгож оруулсан нь “дэлбэлэгч чөтгөр” төрж байгааг илэрхийлнэ. Эх комик дээрээ фэнүүддээ ер бусын сэтгэгдэл үлдээсэн Макиматай хурц зөрчилдсөн Дэнжигийн сэтгэл санааг бас тодотгосон гэж болно.
Киноны трэйлер “Макима миний сэтгэлийг эзэмдсэн. Гэвч бие маань үгэнд орохгүй байна.” гэж Дэнжи хэлж байгаагаар эхэлдэг. Макима, Рэзэ хоёр ээлжлэн гарч байгаа нь түүний дотоод зөрчлийг илтгэнэ.
Болзоо, санаандгүй учрал, үнсэлт. Уянгын эдгээр дүр зураг төд удалгүй эрс өөрчлөгдөж “дэлбэлэгч чөтгөр” болсноор ширүүн тэмцэл өрнөнө. Сүүлийн хагаст дуучин Ёнэзү Кэншигийн дуулсан Iris Out дуу үзэгчдийн анхаарлыг гүн төвлөрүүлнэ.
Chainsaw Man – The Movie: Reze Arc киног 2019 оноос цувралаар нийтлэгдэж эхэлсэн Фүжимото Тацүкигийн “Хөрөөтэй хүн” анимэгээс сэдэвлэн бүтээсэн бөгөөд, цахилгаан хөрөөтэй чөтгөр Почитатай гэрээлсэн Дэнжи хүү чөтгөрийн ангууч болж байгаа түүхийг өгүүлдэг.
2022 онд Японы энимэйшний томоохон компани MAPPA-ийн оролцож бүтээсэн телевизийн цуврал гарч олны анхаарлыг татсан агаад, энэ удаа кинотеатрт гарах бүтээлдээ хамгийн сонирхолтой хэсэг буюу Рэзэгийн хэсгийг голлон харуулж байгаагаараа онцлог ажээ.
