Үзэгчид Брэд Питтэй цуг цагт 350км хурдална… F1: THE MOVIE
2025-06-25 10:42:20
Хурд 350км/цаг. Жирийн нэг жолоочийн хувьд хэзээ ч мэдрэх боломжгүй хурд. Харин дэлхийд номер 1 мото спортын F1(Формула 1) уралдаанд оролцдог тамирчид инженер технологийн гайхамшгаар тоноглогдсон төмөр хүлэгт сууж энэ л хурдыг мэдэрч амь дүйн өрсөлддөг.
Холливудын F1: THE MOVIE кинонд дэлхийд алдартай F1 уралдааны тухай гарах бөгөөд, гол дүр нь Брэд Питт. Хэр сонирхолтой байх бол? гэсэн асуулт толгойд эргэлдэх нь мэдээж. Агуулга нь тодорхой, уралдаан нь залхмаар бол яах вэ? Шуудхан хэлэхэд F1: THE MOVIE хэмжээ дамжааг нь тааруулсан найруулга, суудлаас өндөлзүүлсэн мэдрэмж, галзуу хурдыг бэлэглэж F1 ямар байдгийг яруу тодоор харуулах болно. Түс тас хэлье гэвэл тамирчдын зөрчилдөөн, багийн хямралыг даван туулж байгаа агуулга бол байдаг л зүйл. Гэвч энэ кино энэ л агуулгыг тээж эцсээ хүртэл галзуу хурдална. 2 цаг хагасын турш таныг уйдаахгүй.
Ахмад тамирчин Сонни Хэйс(Брэд Питт) уралдааны үзүүлэлтээр хамгийн муу багт нэгдэж төрөлхийн авьяаслаг шинэ тамирчинтай уралдана. Сонни ч цагтаа буюу хорьж болдоггүй хориод насандаа ирээдүйтэй тамирчин гэгдэж байсан боловч том ослын улмаас нэр нь тодроогүй үлдсэн хүн. Тэгэж байтал эртний анд Рубен(Хавьер Бардем) нь түүнийг зорин ирж өөрийн удирддаг APXGP багт элсүүлж F1 уралдаанд оролцуулдаг.
F1 уралдаанд 10 орчим баг оролцож, нэг багаас хоёр тамирчин өрсөлддөг бөгөөд, Сонни өөрийнх нь хүү байхаар насны тамирчин Жошуа Пирс(Дамсон Идрис)-тэй нэг баг болдог. Асуудал ганц нэгээр тогтохгүй. APXGP багийн үзүүлэлт хамгийн доогуур. Уралдаанд түрүүлж чадахгүй бол баг нь зарагдахдаа тулсан байв. Насаар ч, туршлагаар ч хол зөрүүтэй хоёр тамирчин учир зүйгээ хэзээ олох юм бүү мэд. Залуу Жошуагийн хувьд Сонни хэлбэрдсэн хөгшин, харин Соннид Жошуа нийгмийн сүлжээ, маркетинг л бодсон нялзрай гэж харагдана. Гэтэл нас ахмад Соннид энэ удаагийн F1 уралдаан эцсийн боломж гэдэг нь эргэлзээгүй.
Найруулагч Жозеф Косински камераа яг байх ёстой газар нь байлгаж, сэтгэл донслуулах хөгжим оруулж, “кино шиг кино” бүтээжээ. Top Gun: Maverick(2022) киноны халин нисэх онгоцны хэсгээр үзэгчдийг байж ядуулсан тэрээр энэ удаа ч урам хугалсангүй. Зураг авалтын өнцөг, дурангуудын байрлал үзэгчдийг нэг мэдэхнээ суудлаас нь босгож уралдааны замд оруулахаас гадна, эгшин зуурт жолоочийн суудлын ард суулгана. Энэ бүхэн тусгай эффектийн ач тус. Зургийн найруулагч Клаудио Миранда уралдааны 15 машинд олон өнцгөөс зураг авах чадалтай шинэ камер суурилуулж нэг дор нийт 12 өнцгөөс зураг авсан гэх. Хөгжмийн зохиолч Ханс Циммер сэтгэл түгшээм ая, хэнгэрэг дэлсэх хөгжмөөр үйл явдалд үзэгчдийг улам уусган төвлөрүүлнэ.
Киноноос F1 уралдааны тухай сурч мэдэх ч сонирхол татна. Агаарын эсэргүүцлийг аль болох бууруулах нь инженер технологийн шийдэл агаад багийн ажиллагааны үр дүн. Нарийн төлөвлөсөн A, Б, В төлөвлөгөө хэрэгтэй, эдгээр төлөвлөгөөг хэрэгжүүлэхэд дугуйны хатуулаг, дулааны хэм хэчнээн чухлыг ч мэдэж авна.
F1 уралдааны зохион байгуулагчтай нягт хамтран ажиллаж Силверстөүнд болдог Их Британийн гранпригээс эхлээд Японы Сүзүкагийн гранпри гээд бүх дэлхийн F1 уралдааны замуудаар аялуулна. Дэлхийн аваргын алдар цолыг 7 удаа хүртсэн Льюис Хэмилтон киноны зөвлөхөөр ажиллаж туршлага, нөүхаугаа харамгүй солилцсон байна. Бусад мэргэжилтнүүд ч гэсэн уралдааны хэсгийн урсгал хөдөлгөөний дизайн, жолоодлогын орлон тоглолтод оролцож киног амьдралд улам ойртуулжээ.
F1: THE MOVIE кино 6-р сарын 27-нд нээнэ.
